Հովհաննես Շարամբեյանի անվան ժողովրդական արվեստների թանգարանը՝ ՀՀ կրթության, գիտության, մշակույթի և սպորտի նախարարության աջակցությամբ և Գյումրու համայնքապետարանի համագործակցությամբ, 2022թ․ հուլիսի 16-ին Գյումրիում իրականացրել է «ԳՅՈՒՄՐԻ. վարպետաց քաղաք» խորագրով արհեստների միջազգային փառատոնը:
Փառատոնին մասնակցել են ժողովրդական ստեղծագործության վարպետներ Հայաստանի մի շարք համայնքներից և ԱՊՀ երկրներից, որոնք ներկայացրել են իրենց գեղարվեստական աշխատանքները և իրականացրել վարպետաց դասեր:
Գորգագործության, ասեղնագործության, տիկնիկագործության, փայտագործության, խեցեգործության, ծղոտագործության, դարբնության, փայտի գեղարվեստական մշակման, ազգային խոհանոցի հարուստ ավանդույթները ներկայացնող տաղավարներում վարպետները փառատոնի մասնակիցներին ծանոթացրել են Հայաստանի և ԱՊՀ երկրների ժողովուրդների յուրօրինակ արհեստներին, անցկացրել վարպետաց դասեր, իրականացրել հուշանվերների վաճառք:
Փառատոնն անցկացվել է 2022 թ․ հայտարարված ԱՊՀ ժողովրդական ստեղծագործության և մշակութային ժառանգության տարվա միջոցառումների շրջանակում:
Նպատակը՝ մշակութային մեկ հարթակում արդի շրջանի ժողովրդական արհեստները միավորելը, դրանց ճանաչելիությունը բարձրացնելը և այդ ժառանգությունը կրող ու փոխանցող անհատների ստեղծագործական առաջխաղացմանը նպաստելն է։
Փառատոնը կրում է շարունակական բնույթ՝ ամեն տարի կազմակերպվելով Հայաստանի որևէ համայնքում։
Արհեստների երկրորդ միջազգային փառատոնը կիրականացվի Դիլիջանում, 2024թ․ հուլիսի 20-ին և 21-ին։