Մարտի 10-ին ԵՊՀ պատմության թանգարանում տեղի ունեցավ «Համբերանքի խնձորներ կամ հեքիաթի թանգարանային կեցությունը» թեմայով բանախոսություն։ Բանախոսությամբ հանդես եկավ ԵՊՀ պրոֆեսոր, հեքիաթագետ, «Հարի Փոթեր» վիպաշարի թարգմանիչ Ալվարդ Ջիվանյանը։ Բանախոսը ժողովրդական հեքիաթներին անդրադարձավ նոր դիտանկյունից՝ ներկայացնելով դրանց արդիական ընկալման հնարավորությունները, մասնավորապես հեքիաթի և թանգարանի աղերսները։
Ժողովրդական հեքիաթը, որպես ոչ նյութական ժառանգության մաս, ենթակա չէ թանգարանացման։ Այնուհանդերձ հեքիաթ-թանգարան առնչությունն անտեսել հնարավոր չէ. հեղինակային հեքիաթը կարող է մուտք գործել թանգարան` ենթարկվելով տարաբնույթ փոխակերպումների և վերամարմնավորվելով ու վերստեղծվելով որպես նկարազարդում, քանդակ, սպասքի պարագաներ, հրուշակեղենի գունագեղ փաթեթավորում: Առանձին դեպքերում թանգարանն է հանդես գալիս որպես հեքիաթի և հրաշապատում այլ զրույցների, իրադարձությունների յուրատիպ միջավայր: