«ՖՈԼԿԱՆԻՎ» կրթական նախագծի շրջանակում Ժողովրդական արվեստների թանգարանը շարունակում է ներկայացնել հայկական տոնացույցի մաս կազմող տոներին նվիրված կրթական ծրագրեր, որոնց շարքում Բարեկենդանին հաջորդում են Ծաղկազարդը և Սուրբ Հարության տոնը։
Ծաղկազարդը նշում են Մեծ պահքի վեցերորդ շաբաթվա կիրակի օրը։ Եկեղեցում և կենցաղում հիմնական արարողությունները պտտվում են նոր ծաղկած ուռենու շուրջը։ Եկեղեցում օրը նշանավորվում է որպես Հիսուսի Երուսաղեմ մտնելու օր, երբ ժողովուրդը նրան դիմավորել է ձիթենու, արմավենու և դափնու ճյուղերով, որոնք հին աշխարհում հաղթանակի խորհրդանիշներ էին։ Հայաստանում դրանք փոխարինվել են ուռենու ճյուղերով, քանի որ ուռենին համարվում էր սրբազան ծառ։
Ծաղկազարդի կրթական ծրագրի շրջանակում մասնակիցները կպատրաստեն գարնանային թաղիքե գլխազարդեր և փնջեր, կսովորեն տոնին նվիրված երգեր։