«Ազգային երգ ու պարի ակադեմիա» կրթամշակութային հիմնադրամի հայ ավանդական մշակույթի ուսումնասիրության և հետազոտման «Կարին» գիտական կենտրոնը, ՀՀ ԳԱԱ Արվեստի ինստիտուտի հետ համատեղ, հայ էթնոպարագիտության 125-ամյակին ընդառաջ կազմակերպել էր պարագիտական գիտաժողով։
Գիտաժողովը նվիրված էր հայ անվանի պարագետ, ազգագրագետ, պատմական գիտությունների դոկտոր Էմմա Պետրոոսյանի հիշատակին։ Այն տեղի ունեցավ հունիսի 15-16-ին։
Այնթապի պղնձագործական արվեստի հետքերով․ հունիսի 16-ին Ժողովրդական արվեստների թանգարանում տեղի ունեցավ նոր ժամանակավոր ցուցադրության բացում, որը բացահայտում է Այնթապի ավանդական պղնձագործության հարուստ ժառանգությունը։ Ցուցադրության հիմքում Հրազդան Թոքմաջյանի անձնական հավաքածուն է։
Այնթապը հայկական պղնձագործության նշանավոր կենտրոններից էր, և այս բացառիկ ցուցադրությունը նվիրված է տեղի վարպետների անդուլ աշխատանքին ու պատմությանը: Ցուցադրությունում ներկայացված են նշանավոր Գալեմքեարյան ընտանիքին պատկանած աշխատանքային գործիքներ, հարմարանքներ, զնդաններ ու փորիչներ (XIX դ. վերջ – XXI դ. սկիզբ), Մելքոն Գալեմքեարյանի կողմից XX դարասկզբին պատրաստված պատմական փուքսը, այնթապցի վարպետների պատրաստած արծաթե և պղնձե առարկաների լավագույն նմուշներ, վարպետների կենսագրական տվյալներն ու արխիվային լուսանկարները:
«Մեր երգերը և մենք» նախաձեռնության թիմն այցի էր գնացել ժողովրդական երգերի գիտակ, երգասաց Թամար տատին։ Ծնունդով ապարանցի Թամարա Հակոբյանը վանեցի Կոմիտասի ու մշեցի Հասմիկի դուստրն է: Նա եղել է Ապարանում շատ հայտնի «Մասունք» և «Կանթեղ» համույթների մեներգչուհին։ Տարբեր բանահավաքներ Թամար տատից գրառել են ժողովրդական մի շարք երգեր։ Ներկայումս էլ նրա ձայնն ու ներկայությունը կարող եք վայելել «Տոնացույց» ժողովրդական թատրոնում։
«Մեր երգերը և մենք» նախաձեռնության այդ այցելությունն ու Թամար տատի հետ զրույցը վերածվել է վավերագրական ֆիլմի, որն էլ հունիսի 14-ին ցուցադրվեց ՄԷԿ ԿԱԴՐ 24-րդ փառատոնին։
Թամար տատի հետ զրուցեցին՝ Գոհար Մկրտչյանը, Գևորգ Հովհաննիսյանը, Անի Նավասարդյանը, Վահե Պապյանը, Մերի Սերոբյանը։ Ֆիլմը պատրաստեց Մերի Սերոբյանը։
Հունիսի 13-ին «10:30 ակումբ»-ը կազմակերպել էր «Ազգային երգի ու պարի կենդանի շունչը» թեմայով նախաճաշ՝ «Նարոտ» ավանդական միջոցառումների թիմի հետ։
Տեղի ունեցավ հայկական յուրահատուկ աղանդերի համտես, ավանդական երգերի ու պարերի ուսուցում, հացի ու աշխատանքային ծեսերի մասին զրույց։
Օրբելի եղբայրների տուն-թանգարանը երեխաներին հրավիրում է մասնակցելու ««Սասունցի Դավիթ» դյուցազներգությունը» կրթական ծրագրին։
Աշակերտներին նախ ներկայացվում է «Սասունցի Դավիթ» դյուցազներգության պատմությունը, ձևավորումը և դրա դերը հայ մշակույթում։ Նրանք ծանոթանում են էպոսի հերոսներին և հիմնական գաղափարներին, էպոսի 1000-ամյակի միջոցառումներին, ինչպես նաև Երվանդ Քոչարի նկարազարդումներին, որոնք պատրաստվել են Հովսեփ Օրբելու պատվերով։ Դիտարկվում են էպոսի 1000-ամյակին նվիրված` հայտնի նկարիչների ստեղծագործությունները, «Սասունցի Դավիթ» պատկերապատումը։ Ներկայացվում են նաև թանգարանի ֆոնդում պահվող նյութերը` տարբեր տարիներին հրատարակված գրքեր, էպոսի 1000-ամյակին նվիրված թերթեր և ամսագրեր, ծրագրեր, տպագրական կլիշեներ, հուշամեդալ, կրծքանշան։ Աշակերտները դիտում են «Սասունցի Դավիթ» անիմացիոն ֆիլմը, որից հետո կազմակերպվում է քննարկում։ Երեխաները բաժանվում են 2 խմբի, խոսում են ֆիլմի հերոսների, նրանց արարքների և էպոսի հիմնական գաղափարների մասին։ Այնուհետև փորձում են բեմականացնել էպոսից մի հատված։ Հաղթող խմբի մասնակիցները ստանում են էպոսի հերոսների պատկերներով ինքնակպչուններ։ Գործնական աշխատանքի ընթացքում երեխաները լաբիրինթում հայտնված Սասունցի Դավթին կօգնեն գտնել ճանապարհը, կգտնեն նկարների տարբերությունները, կնկարազարդեն էպոսի հերոսների պատկերները։
Կրթական ծրագիրը նախատեսված է 2-9-րդ դասարանների աշակերտների համար։
Արժեքը կրթական ծրագրի համար` 1000 դրամ (1 անձը)։
Մասնակցության համար պարզապես զանգահարե՛ք․ +374 (98) 68 56 06։
Հասցե՝ ք․ Ծաղկաձոր, Օրբելի եղբայրների փողոց 12։
«Բացահայտիր Սյունիքը․ ճանապարհորդություն ժամանակի միջով» ամառային դպրոցի շրջանակում Սիսիանի պատմության թանգարանում երեխաները կմասնակցեն «Նախշերի լեզուն․ գորգեր» կրթական ծրագրին:
Կրթական ծրագրի ընթացքում մասնակիցները ծանոթանում են հայկական գորգագործության պատմությանը, գորգերի տեսակներին, զարդանախշերին, գույների խորհրդաբանությանը, փորձում հասկանալ, թե ինչ գաղափարներ և պատմություններ կարող են փոխանցել դրանք։
Եղեգնաձորի երկրագիտական թանգարանը հունիսի 12-ին՝ ժամը 14։00-ին, երեխաներին հրավիրում է մասնակցելու կավագործության վարպետաց դասի, որի ընթացքում կավագործ վարպետ Զաքար Մկրտչյանի օգնությամբ նրանք կպատրաստեն թանգարանային որոշ գեղեցիկ նմուշների կրկնօրինակներ և կտանեն իրենց հետ։
Մուտքը` 3000 դր․։
Գրանցվել հետևյալ հեռախոսահամարով՝ 098697403։
Նոյեմբերյանի Մշակույթի կենտրոնը հրավիրում է 5–15 տարեկան երեխաներին մասնակցելու թաղիքագործության անվճար բաց դասերին։
Առաջին հանդիպումը՝ հունիսի 15-ին՝ ժամը 11:00-ին։
Դասընթացները վարում է փորձառու թաղիքագործ Դիանա Մամյանը։
Մուտքն ազատ է։
Հեռախոսահամար՝ 098 51 89 92։
Green Rock հիմնադրամը, նպատակ ունենալով պահպանել և տարածել հայկական մշակութային ժառանգությունը,Հայկական գործվածքի թանգարանի հետ համագործակցությամբ, մեկնարկում է արվեստի տարբեր ճյուղերին նվիրված վարպետության դասերի շարք Դիլիջանում։
Այս վարպետության դասերը «Ամառային ծրագրի» մի մասն են, որը շարունակվելու է ամբողջ ամառվա ընթացքում՝ համախմբելով մշակույթի, ստեղծագործության և ավանդույթների սիրահարներին։
Շարքի առաջին հանդիպումը նվիրված է հայկական կարպետագործության արվեստին՝ մասնակիցներին հնարավորություն ընձեռելով ծանոթանալու հայկական արհեստագործական մշակույթի կարևորագույն ավանդույթներից մեկին։
Ժամը և օրը՝ 11.06.2026, 15:30–17:30
Վայրը՝ Հայկական գործվածքի թանգարանի պատշգամբ, Կալինինի փողոց 1, Դիլիջան
Հովհաննես Շարամբեյանի անվան Ժողովրդական արվեստների թանգարանը «ՖՈԼԿԱՆԻՎ» ծրագրի շրջանակներում Հրանտ Բաղդագյուլյան արվեստանոցի հետ համատեղ հայտարարում է ընդունելություն ժանեկագործության խմբակում։
Դասընթացը լիովին անվճար է, կարող են գրանցվել 14-100 տարեկան բոլոր ցանկացողները։
– Մեկնարկը՝ հունիսից
– Շաբաթվա օրեր՝ շաբաթ և կիրակի
– Տևողությունը՝ 3 ամիս
– Դասընթացավար՝ Իրինա Գրիգորյան
– Վայր՝ Գորիսի Հրանտ Բաղդագուլյանի արվեստանոց (Սյունիքի 14):
Գրանցվելու համար կարող եք զանգահարել +374 94 943053 հեռախոսահամարով։
Ծրագիրն իրականացվում է ՀՀ ԿԳՄՍ նախարարության աջակցությամբ: