«Ժողովուրդն է ամենամեծ ստեղծագործողը, գնացե՛ք և սովորեցե՛ք նրանից»։ Կոմիտաս Վարդապետ
Կոմիտաս Վարդապետի ազգագրական ժառանգությունը մեծ մասամբ մնացել է ստվերում, և այսօր անհատ կատարողների կամ խմբերի երկացանկերում անհամեմատ փոքր մաս է կազմում։ Ավելին, շատ հաճախ սխալ մեկնաբանման արդյունքում երգը կորցնում է իր բնականությունը, հետևապես՝ ազգային դիմագիծը։ Հաշվի առնելով այս հանգամանքը՝ Կոմիտասի թանգարան–ինստիտուտը հանդես է գալիս նոր նախաձեռնությամբ՝ ստեղծել հայ ավանդական երգի համույթ:
Նախագծի նպատակն է՝ տարածել Կոմիտաս Վարդապետի ազգագրական ժառանգությունը հնարավորինս ամբողջական ծավալով, վերականգնել գեղջկական երգի բնական կատարողականությունը, ասել է թե՝ երգը կատարել այնպես, ինչպես երգում է ինքը՝ ժողովուրդը։
Նախագծին կարող են մասնակցել 18-35 տարեկան բոլոր այն անձինք, ովքեր հետաքրքրված են հայ ավանդական երաժշտությամբ, պատրաստ են կամավոր հիմունքներով մասնակցել նախագծի իրականացմանը և նպաստել ազգային մշակույթի տարածմանը։