ICH ARMENIA, Author at ՀՀ ՈՆՄԺ • Page 9 of 81

«Ալեքսանդրապոլի բաղնիքի ծեսը». դասախոսություն

Գյումրու Ժողովրդական ճարտարապետության և քաղաքային կենցաղի թանգարանում ազգագրագետ Կարինե Բազեյանը ներկայացրեց դասախոսություն՝ «Ալեքսանդրապոլի բաղնիքի ծեսը» թեմայով։
Հետաքրքիր և բովանդակալից հանդիպման արդյունքում խոսվեց բաղնիք գնալու ավանդույթի մասին, թե ինչպես էին ալեքպոլցիները բաղնիք գնում հատուկ բոխչայով, սպիտակեղենով, գլխակապերով, շապիկներով։
Բաղնիք գնալը եղել է մեծ արարողակարգ: Գնում էին առավոտյան ժամը 10-ին և վերադառնում երեկոյան, իրենց հետ տանելով նաև սնունդ:
Հետաքրքիր էր նաև, որ կանայք գնում էին ամբողջությամբ զարդարված, թանկարժեք զարդերով, դրանով ուզում էին ցույց տալ իրենց սոցիալական վիճակը:
Դասախոսությունները իրականացվում են ՀՀ ԳԱԱ Շիրակի հայագիտական հետազոտությունների կենտրոնի հետ համագործակցությամբ:

«Պարի տոնն ազգային ոգով»

Ապրիլի 29-ին ԵԹԿՊԻ-ի աջակցությամբ և Խորեոգրաֆիայի ամբիոնի դասախոս Արթուր Հարությունյանի նախաձեռնությամբ Հանրապետության հրապարակում կայացավ «Պարի տոնն ազգային ոգով» խորագրով մշակութային ծրագիրը՝ մայրաքաղաքի և մարզային երաժշտական դպրոցների դհոլահարների, ավանդական համույթների, պետական անսամբլների և այլ պարային խմբերի մասնակցությամբ։

Պարի միջազգային օրը Անգլիական այգում

Պարը հայոց աղոթք և ռազմակոչ է միաժամանակ։ Եվ երբ պարը կռվից էլ զորեղ է դառնում, կռիվը պարից էլ ավելի թեթև է ճախրում, պարը հայոց հավաքական ոգու կանչն է․ պարի միջազգային օրը՝ ապրիլի 29-ին, Անգլիական այգում միջոցառում էր նախաձեռնել «Կարին» ավանդական երգի-պարի խումբը։

«Ինչպես են ստեղծվում արհեստները». անիմացիոն ֆիլմեր

ՀՀ կրթության, գիտության, մշակույթի և սպորտի նախարարության աջակցությամբ Հովհաննես Շարամբեյանի անվան ժողովրդական արվեստների թանգարանում տեղի է ունեցել «Ինչպես են ստեղծվում արհեստները» ծրագրի շնորհանդեսը:
Միջոցառմանը ներկա են եղել ԿԳՄՍ նախարար Ժաննա Անդրեասյանը և նախարարի տեղակալ Ալֆրեդ Քոչարյանը:
Ծրագրի շրջանակում ստեղծվել են 6 կարճամետրաժ անիմացիոն ֆիլմեր, որոնք պատմում են Հայաստանում հնագույն ժամանակներից մինչև մեր օրերը կիրառվող արհեստների մասին՝ գորգագործություն և կարպետագործություն, ասեղնագործություն և ժանեկագործություն, թաղիքագործություն, խեցեգործություն, դարբնություն, փայտարվեստ:
ԿԳՄՍ նախարար Ժաննա Անդրեասյանը շնորհակալություն է հայտնել մասնակից կառույցներին, խմբերին ու անհատներին կատարած մեծ աշխատանքի համար. «Աշխատանքը հաջողում է, երբ ապահովված է ստեղծագործական առողջ միջավայր, որտեղ յուրաքանչյուրը մտածում է լավ արդյունքի մասին: Այս ծրագրի արդյունքը պարտավորեցնում է ոլորտը մշտապես ուշադրության կենտրոնում պահել, տարածել ժողովրդական արվեստների մասին գիտելիքը թե՛ միջազգային հարթակներում, թե՛ մեր հանրության շրջանում: Ծրագիրը կարող է դառնալ հրաշալի կրթական նյութ նաև դպրոցների համար. այն մեր երեխաների համար առավել տեսանելի և ընկալելի կդարձնի դասագրքային գիտելիքը: Առանձնահատուկ շնորհակալություն եմ հայտնում մեր ժողովրդական վարպետներին, որոնց աշխատանքը տեսանելի դարձնելու խնդիր ունենք: Ուրախ եմ, որ թանգարանի հետ հաջող համագործակցությամբ նրանց աշխատանքն ավելի գնահատված և արժևորված է դառնում»:
Ժաննա Անդրեասյանն ընդգծել է, որ նախարարությունը պատրաստակամ է աջակցելու ազգայինի տարածմանը և հանրահռչակմանը միտված գաղափարներին:
Ֆիլմաշարը նվիրված է ՅՈՒՆԵՍԿՕ-ի «Ոչ նյութական մշակութային ժառանգության պաշտպանության մասին» կոնվենցիայի 20-ամյակին և ներկայացվում է ՅՈՒՆԵՍԿՕ-ի տարբերանշանով։
Երկլեզու՝ հայերեն և անգլերեն ֆիլմերի ստեղծման շուրջ աշխատել են «Invisible Friends» անիմացիոն ստուդիայի մասնագետները, որոնք տարբեր երկրներից են՝ Հայաստան, Ռուսաստան, Վրաստան, Իսրայել, Ֆրանսիա:
Ֆիլմերի վիզուալ բովանդակությունը ստեղծելիս օգտագործվել են ինչպես Հովհաննես Շարամբեյանի անվան ժողովրդական արվեստների թանգարանի, այնպես էլ Հայաստանի պատմության թանգարանի հավաքածուն և անհատ վարպետների անձնական արխիվները։
Միջոցառման շրջանակում տեղի է ունեցել նաև «Խնձորեսկ» տիպի գորգի կտրման արարողություն՝ նվիրված թանգարանի 45-ամյակին: Այն գործել է Լեռնային Ղարաբաղից բռնի տեղահանված Մարգարիտա Խաչյանը, որը 2023 թվականից աշխատում է Ժողովրդական արվեստների թանգարանում: Ելույթով հանդես է եկել նաև թանգարանի նորաստեղծ «Մանել» երգչախումբը:
Նախարար Ժաննա Անդրեասյանը թանգարանի տնօրեն Լուսինե Թորոյանի ուղեկցությամբ շրջայց է կատարել թանգարանում, ծանոթացել հիմնական ցուցանմուշներին, ժամանակավոր ցուցադրություններին և կրթական ծրագրերին:

«Ինչպես են ստեղծվում արհեստները» անիմացիոն ֆիլմերի դիտում-քննարկում

Ապրիլի 26-ին Ժողովրդական արվեստների թանգարանում տեղի ունեցավ «Ինչպես են ստեղծվում արհեստները» ծրագրի շրջանակում ստեղծված 6 անիմացիոն կարճամետրաժ ֆիլմերի դիտում՝ հայերեն և անգլերեն լեզուներով, ինչպես նաև հանդիպում ստեղծագործական կազմի հետ և շնորհակալագրերի հանձնում ծրագրի իրականացմանը աջակցած անձանց։
Կարճամետրաժ 6 անիմացիոն ֆիլմերը պատմում են Հայաստանում հնագույն ժամանակներից մինչև մեր օրերը գոյություն ունեցող արհեստների մասին՝ գորգագործություն և կարպետագործություն, խեցեգործություն, դարբնություն, ասեղնագործություն և ժանեկագործություն, փայտի գեղարվեստական մշակում, թաղիքագործություն։
Սա թանգարանային հավաքածուների հիման վրա ստեղծված եզակի մշակութային նախագիծ է։ Այստեղ մեկտեղված են ժողովրդական ավանդույթները, գիտությունը, տեսողական արվեստն ու երաժշտությունը, ժամանակակից տեխնոլոգիաները և կրթական կարևոր բաղադրիչը։
Ծրագիրն իրականացրել է Հովհաննես Շարամբեյանի անվան ժողովրդական արվեստների թանգարանը՝ «Invisible Friends» անիմացիոն ստուդիայի հետ համագործակցությամբ և ՀՀ կրթության, գիտության, մշակույթի և սպորտի նախարարության ֆինանսական աջակցությամբ։
Ֆիլմաշարը նվիրված է ՅՈՒՆԵՍԿՕ-ի «Ոչ նյութական մշակութային ժառանգության պաշտպանության մասին» կոնվենցիայի 20-ամյակին։

«Եվրոպական համակարգողների ցանց»-ի տեղեկագրի անդրադարձը

ՅՈՒՆԵՍԿՕ-ի 2003թ․ «Ոչ նյութական մշակութային ժառանգության պաշտպանության մասին» կոնվենցիայի 20-ամյակին նվիրված «Եվրոպական համակարգողների ցանց» նախաձեռնության տեղեկագրի 6-րդ թողարկումն անդրադարձել է «Ինչպես են ստեղծվում արհեստները» ծրագրին։
Ծրագրի արդյունքում ստեղծվել են երկլեզու կարճամետրաժ անիմացիոն ֆիլմեր, որոնք պատմում են Հայաստանում հնագույն ժամանակներից մինչև մեր օրերը գոյություն ունեցող արհեստների մասին:
Ծրագիրն իրականացվել է ՀՀ ԿԳՄՍ նախարարության ֆինանսական աջակցությամբ և Հովհաննես Շարամբեյանի անվան ժողովրդական արվեստների թանգարանի նախաձեռնությամբ։

«Ձեռամբ հյուսած» ծրագիր

Ալավերդի քաղաքում գորգագործության և կարպետագործսւթյան դասերի մեկնարկը տրված է: ՀՀ ԿԳՄՍ նախարարության ֆինանսավորմամբ իրամանացվող դասընթացները կազմակերպվում է «Ձեռամբ հյուսած» ծրագրի շրջանակներում՝ «Արևածին» կրթամշակութային ՀԿ-ի արվեստանոցում:
Դասընթացներն ավնճար են: Անհրաժեշտ բոլոր նյութերը տրամադրվում են՝ դասընթացը լիարժեք իրականացնելու համար:
Հերթագրվելու և առավել մանրամասն տեղեկությունների համար կարող եք զանգահարել 041061012 հեռախոսահամարով:

Կրթական ծրագրեր Ժողովրդական արվեստների թանգարանում

Ապրիլի 17-ին Հովհաննես Շարամբեյանի անվան Ժողովրդական արվեստների թանգարանում ժողովրդական վարպետներ Անժելա և Անահիտ Աբգարյաննները մի խումբ զբոսաշրջիկների համար անցկացրին ասեղնագործության կրթական ծրագիր։ Թանգարանը շնորհակալություն է հայտնում ”Armenia Holidays” զբոսաշրջային կազմակերպությանը՝ այցի կազմակերպման համար։
Լեռնանիստի Մշակույթի տան հելունագործության խմբակի սաների համար վարպետներն անցկացրին հելունագործության և մաքրամեի կրթական ծրագիր։ Ծրագրի շրջանակում տաղանդաշատ փոքրիկները պատրաստեցին գեղեցիկ թևնոցներ։
Թանգարանի կրթական ծրագրերը նախատեսված են տարբեր տարիքային խմբերի համար։ Մանրամասների համար կարող եք զանգահարել 010569380 հեռախոսահամարով։

«ՏԱՐԱԶֆեստ» 6-րդ փառատոն

Սույն թվականի oգոստոսի 10-ին և 11-ին Երևան քաղաքում կանցկացվի «ՏԱՐԱԶֆեստ» 6-րդ փառատոնը, որն ուղղված է հայկական մշակույթի և մասնավորապես՝ տարազի ժողովրդականացմանը ինչպես հայ հասարակության, այնպես էլ օտարերկրյա զբոսաշրջիկների շրջանում:
«ՏԱՐԱԶֆեստ» մշակութային փառատոնին մասնակցելու համար հրավիրվում են ոլորտում ներգրավված արհեստագործ վարպետներ և դիզայներներ Հայաստանից և արտերկրից, ովքեր ցանկանում են ներկայացնել իրենց արտադրանքը, ձեռագործ աշխատանքները և հագուստների հավաքածուները: Մասնակցել ցանկացողները կարող են գրանցվել մինչև հունիսի 5-ը այս հղումով. https://shorturl.at/jquxV ։
Տեղերը սահմանափակ են։ Մասնակցությունն անվճար է:
Ծրագիրն իրականացվում է ՀՀ Զբոսաշրջության կոմիտեի աջակցությամբ։

«Կրթիր՝ կրթողին». նոր հմտություններ ԼՂ-ից բռնի տեղահանված անձանց համար

ՀՀ կրթության, գիտության, մշակույթի և սպորտի նախարարության ֆինանսական աջակցությամբ և «Տերյան մշակութային կենտրոն» հասարակական կազմակերպության նախաձեռնությամբ մեկնարկել է «Կրթիր՝ կրթողին» ծրագիրը: Այն հավանության է արժանացել «Ոչ նյութական մշակութային ժառանգության պահպանության ծրագրեր» անվանակարգով դրամաշնորհային մրցույթի արդյունքում:
Ծրագրի նպատակն է ապահովել Լեռնային Ղարաբաղից բռնի տեղահանված արցախցիների զբաղվածությունը՝ ձեռարվեստի գիտելիքներ և հմտություններ ձեռք բերելու միջոցով, ինչպես նաև նպաստել նրանց ստեղծագործական, կրթական, աշխատանքային պայմանների և եկամուտ ստանալու հնարավորությունների ստեղծմանը:
Ծրագրի շրջանակում նախատեսվում է ԼՂ-ից բռնի տեղահանված 30 արցախցիների համար կազմակերպել հայկական ավանդական ձեռարվեստի եռամսյա դասընթացներ (թաղիքագործություն, ասեղնագործություն, կավագործություն), որոնք կնպաստեն ոչ նյութական մշակութային ժառանգության արժեքների պահպանմանը, փոխանցմանն ու տարածմանը։ Ուսումնական գործընթացը կիրականացվի տեսական և գործնական պարապմունքների զուգորդմամբ:
Այսպիսով, մասնակիցները ձեռք կբերեն նոր մասնագիտություններ ու աշխատանքային հմտություններ, կունենան սեփական արտադրանքի վաճառքի հնարավորություն՝ համագործակցային կապեր հաստատելով և իրենց հերթին շարունակական աջակցություն ցուցաբերելով մյուս արցախցիներին:

Հայաստանի Հանրապետության Ոչ Նյութական Մշակութային Ժառանգություն

All posts by : ICH ARMENIA