Հարգելի՛ Բերձորի բնակիչներ, սիրով հրավիրում ենք Ձեզ Ռուդիկ Հարոյանի անվան «Մասունքի» ավանդական երգի-պարի համույթի համերգին` նվիրված Ապրիլյան քառօրյա հերոսական պատերազմին:
Համերգը տեղի կունենա մարտի 30-ին Բերձորի Վահան Թեքեյանի անվան 1 միջնակարգ դպրոցի դահլիճում:
Ժամը 18:00-ին
Մշակույթի կենտրոնը շնորհավորում է տիկնիկագործության խմբակի սաներին և դասատու Ալբինա Պետրոսյանին օրվա կապակցությամբ։
Այս օրը դասարանը հանդես եկավ իր անդրանիկ ցուցահանդեսով։ Այն բացվեց քաղաքային գրադարանում , որտեղ նույն օրը նշվում էր պոեզիայի միջազգային օրը։
Գեղեցիկ և հետաքրքիր նախաձեռնություն է, երբ երկու տոնը նշվում է մեկ օրում, մեկ վայրում՝ հավասար իրավունքներով։
Երեխաների ձեռքով արարված գեղեցիկ և հմայիչ հայուհիները՝ յուրօրինակ, չկրկնվող, հայկական ազգային տարազներով, շոյում էին բոլորի աչքերը և կարծես պատմում հայուհու հույզերի, հմայքի և ապրումների մասին։
Մաղթենք նրանց անխափան աշխատանք և նորանոր ձեռքբերումներ։ Երկու տոների կապակցությամբ տիկնիկներից մեկը իր տեղը գտավ Մշակույթի նախարարությունում։
Հայաստանյան որոշ լրատվամիջոցներում հրապարակված տեղեկությունն այն մասին, թե Հայաստանը դիմել է ՅՈՒՆԵՍԿՕ-ին՝ հինգ ոչ նյութական մշակութային արժեք կազմակերպության ցանկում ընդգրկելու համար, չի համապատասխանում իրականությանը։ Այս մասին նշել է ՀՀ մշակույթի նախարարության ոչ նյութական մշակութային ժառանգության մասնագետ Նաիրա Կիլիչյանը:
«Զարմանալի է, թե ի՞նչ աղբյուրի հիման վրա են լրատվամիջոցները նման եզրակացության եկել: Իրականում 2019 թվականի փետրվարի 21-ին ՀՀ կառավարության նիստում հավանության է արժանացել ՀՀ մշակույթի նախարարության ներկայացրած որոշման նախագիծն այն մասին, որ Հայաստանի Հանրապետության ոչ նյութական մշակութային ժառանգության արժեքների ցանկը համալրվում է, լրացում է կատարվում: Արդյունքում ցանկում ընդգրկվել է հինգ ոչ նյութական մշակութային արժեք, որոնք են՝ «Որդան կարմիր. հայկական որդանին առնչվող ավանդական գիտելիքներ, հմտություններ և փորձառությունը», «Գյումրվա կլկլանը (մուշուրբա)», «Ստվերների տիկնիկային թատրոնը», «Պարկապզուկը (տիկ)», «Կոխ ըմբշամարտը»: Մինչ այդ ցանկում ընդգրկված էր յոթ արժեք: Դրանք են «Կարոս խաչ» վիպերգը, «Լարախաղացությունը (փահլևանի խաղեր)», «Վիճակի երգերը», «Ավետիսը», «Խաչբուռը», «Ասեղնագործությունը», «Բարեկենդանը»,-ներկայացրեց Կիլիչյանը:
Նա շեշտեց, որ ՀՀ կառավարությանը ներկայացված այդ փաստաթղթի տեղեկանք-հիմնավորման մեջ գրված է, որ ցանկերի թարմացման հեռահար նպատակն այն է, որ հետագայում, երբ ՅՈՒՆԵՍԿՕ-ի ոչ նյութական մշակութային ժառանգության պաշտպանության մասին կոնվենցիայով որևէ արժեքի մասին Հայաստանը հայտ ներկայացնի ՅՈՒՆԵՍԿՕ, այդ արժեքը գրանցված լինի Հայաստանի պետական ցանկերում։
Մասնագետի խոսքով՝ Հայաստանի Հանրապետության ոչ նյութական մշակութային ժառանգության արժեքների ցանկերում գրանցված տարրերը ՅՈՒՆԵՍԿՕ-ին են ներկայացվում ՀՀ մշակույթի նախարարին կից ոչ նյութական մշակութային ժառանգության հարցերի մասնագիտական խորհրդում քննարկվելուց և ՀՀ Արտաքին գործերի նախարարության՝ ՅՈՒՆԵՍԿՕ-ի Հայաստանի ազգային հանձնաժողովի հավանությանն արժանանալուց հետո միայն:
Նաիրա Կիլիչյանը պատմեց, որ ՀՀ-ում գոյություն ունի պետականորեն սահմանված ոչ նյութական մշակութային ժառանգության օրենքի հիման վրա սահմանված երեք ցանկ։
«Առաջինում ընդգրկվում են ոչ նյութական մշակութային ժառանգության կենսունակ արժեքները, մյուս ցանկում՝ անհապաղ պաշտպանության կարիք ունեցող ոչ նյութական մշակութային ժառանգության արժեքները, երրորդում ՝ մշակութային տարածքները, որոնք կենսունակ են և որտեղ միջավայր է ստեղծվել ոչ նյութական մշակութային ժառանգության արժեքների պահպանության համար: Այս կամ այն արժեքի այդ ցանկերում ընդգրկվելու առաջարկները նախարարությունը հիմնականում ստանում է ՀՀ քաղաքացիներից, հասարակական կազմակերպություններից, տարբեր գերատեսչություններից, պետական կազմակերպություններից: Հայաստանը յուրաքանչյուր երկու տարին մեկ ոչ նյութական մշակութային ժառանգության կոնվենցիայով ՅՈՒՆԵՍԿՕ հայտեր է ներկայացրել: 2008-ին եղել է «Դուդուկն ու դրա երաժշտությունը», 2010-ին՝ «Խաչքարը», 2012-ին՝ «Սասունցի Դավիթ էպոսի կատարողական դրսևորումները», 2014-ին՝ «Լավաշը», 2017-ին ներկայացվել է «Քոչարի ավանդական խմբապարը»: Այս տարվա համար նույնպես հայտ ենք ներկայացնելու: Դեռ փակագծերը չեմ բացի»,-եզրափակեց մասնագետը:
ՀՀ կառավարության փետրվարի 21-ին ընդունված «Հայաստանի Հանրապետության կառավարության 2011 թվականի հունվարի 20-ի N 36-Ն որոշման մեջ լրացումներ կատարելու մասին» որոշման համաձայն՝ Հայաստանի Հանրապետության ոչ նյութական մշակութային ժառանգության արժեքների ցանկը համալրվել է ևս 5-ով. դրանք են՝ «Որդան կարմիր. հայկական որդանին առնչվող ավանդական գիտելիքներ, հմտություններ և փորձառություն», «Գյումրվա կլկլան (մուշուրբա)», «Ստվերների տիկնիկային թատրոն», «Պարկապզուկ (տիկ)», «Կոխ ըմբշամարտ» արժեքները: Մինչ այդ ցանկում էր 7 արժեք` «Կարոս խաչ» վիպերգ, «Լարախաղացություն (փահլևանի խաղեր)», «Վիճակի երգեր», «Ավետիս», «Խաչբուռ», «Ասեղնագործություն», «Բարեկենդան»։
Հաղորդագրության մեջ նաև նշված է. «Հայաստանի Հանրապետության` անհապաղ պաշտպանության կարիք ունեցող ոչ նյութական մշակութային ժառանգության ցանկերի գրանցման ու կազմման չափորոշիչները և դրանց հիման վրա կազմված ոչ նյութական մշակութային ժառանգության արժեքների ցանկը» հաստատվել է ՀՀ կառավարության 2011 թվականի հունվարի 20-ի N 36-Ն որոշմամբ:
Ներկա որոշմամբ Հայաստանի Հանրապետության անհապաղ պաշտպանության կարիք ունեցող ոչ նյութական մշակութային ժառանգության արժեքների առկա ցանկը համալրվել է, որի անհրաժեշտությունը պայմանավորված է ՅՈՒՆԵՍԿՕ-ի 2003 թվականի «Ոչ նյութական մշակութային ժառանգության պաշտպանության մասին» կոնվենցիայի և Հայաստանի Հանրապետության՝ «Ոչ նյութական մշակութային ժառանգության մասին» օրենքի դրույթներով»:
Անժելա Համբարձումյան
1999թ.-ին ՅՈՒՆԵՍԿՕ-ն փետրվարի 21-ը հռչակեց Մայրենի լեզվի միջազգային օր՝ ի նպաստ լեզուների իրավունքների ճանաչման և գործածության աջակցման։
ՀՀ Սահմանադրությամբ ամրագրված է, որ Հայաստանի Հանրապետության պետական լեզուն հայերենն է:
Հայաստանի Հանրապետության կողմից` Վրաստանի ու Ռուսաստանի աջակցությամբ ներկայացված «Բանաստեղծ, գրող, թարգմանիչ Հովհաննես Թումանյանի (1869-1923թթ.) ծննդյան 150-ամյակն» ընդգրկված է ՅՈւՆԵՍԿՕ-ի՝ Հռչակավոր մարդկանց և կարևոր իրադարձությունների 2018-2019 թվականների օրացույցում և նշվում է ՅՈՒՆԵՍԿՕ-ի հետ համատեղ:
ՀՀ մշակույթի նախարարության նախաձեռնությամբ, ս. թ. փետրվարի 13-ին` ժամը 17:00-ին, «Գառնի» պատմամշակութային արգելոց-թանգարանում կնշվի Տեառնընդառաջը: Միջոցառման մասնակիցները Գառնի համայնքի Սուրբ Խաչ եկեղեցու կանթեղներից վերցված կրակով կշարժվեն դեպի «Գառնի» պատմամշակութային արգելոց-թանգարան։ Ապա արգելոց-թանգարանի տարածքում, Սիոն եկեղեցու հիմքերի դիմաց (խոտածածկ հատվածում) կվառվի Տեառընդառաջի խարույկը:
Ազգագրական երգի-պարի կատարումներով հանդես կգա «Գաթա» բենդը:
#Գառնուտաճար #Տեառընդառաջ
«Արցախյան գորգարվեստ» հանրապետական երրորդ մրցույթ
1. Մրցույթի պատմությունը
ԼՂՀ մշակույթի և երիտասարդության հարցերի նախարարության ոչ նյութական մշակութային ժառանգության պահպանման ծրագրի շրջանակներում 2014 թվականին անց է կացվել «Արցախյան գորգարվեստ» հանրապետական առաջին մրցույթը:
2015 թվականին կայացել է երկրորդ մրցույթը, որին մասնակցել են 34 անձինք՝ 41 աշխատանքներով:
Գնահատող հանձնախմբի որոշմամբ լավագույն աշխատանքներն արժանացել են համապատասխան մրցանակների: Սահմանվել են նաև խրախուսական մրցանակներ:
2. Մրցույթի նպատակները
ոչ նյութական մշակութային ժառանգության պահպանում. արցախյան գորգագործական ու ասեղնակարի մշակութային ավանդույթների վերականգնում, ժամանակակից գեղարվեստական ճաշակին ու պատկերացումներին բնորոշ տարրերով լրացում. ժողովրդական արհեստների հանրահռչակում, զարգացում և փոխանցում սերունդներին. ազգային ավանդական մշակույթի հանդեպ հարգանքի ու հոգածության վերաբերմունքի արմատավորում:
3. Մրցույթի կազմակերպիչը
ԼՂՀ մշակույթի և երիտասարդության հարցերի նախարարություն.
– ԼՂՀ մշակույթի և երիտասարդության հարցերի նախարարության «Ղուկասյան եղբայրների անվան Արցախի բարբառի և ազգագրության ուսումնասիրման կենտրոն».
– Մշակութային ժառանգության և ժողովրդական արհեստների բաժին:
4. Մրցույթի կազմկոմիտեն
5. Մրցույթի գնահատող հանձնախումբը
կազմավորվում է ԼՂՀ մշակույթի և երիտասարդության հարցերի նախարարի հրամանով. ուսումնասիրում և փակ քվեարկությամբ գնահատում է մրցույթին ներկայացված աշխատանքները՝ 10 բալանոց սանդղակով. սահմանում է մրցանակային ֆոնդը. անհրաժեշտության դեպքում կարող է մրցանակները կիսել կամ չշնորհել, ինչպես նաև` սահմանել խրախուսական մրցանակներ:
6. Մրցույթի անցկացման պայմանները
մրցույթն անց է կացվում 1 փուլով` 3 անվանակարգերով.
– «Գորգ»
– «Կարպետ»
– «Ասեղնագործություն»
մասնակիցների տարիքային սահմանափակում չկա. նախորդ մրցույթում առաջին մրցանակային տեղեր զբաղեցրած մասնակիցները երկրորդ անգամ նույն անվանակարգով մասնակցելու իրավունք չունեն. մրցույթին կարող են մասնակցել անհատ հյուսողներ ԼՂՀ-ից. յուրաքանչյուր մասնակից նույն անվանակարգում իրավունք ունի ներկայացնելու միայն մեկ աշխատանք. պարտադիր պայման է արցախյան գորգապատկերների և զարդանախշերի օգտագործումը՝ գունային ճիշտ համադրությամբ. մասնակիցները, ցանկության դեպքում, արցախյան գորգապատկերների և զարդանախշերի նկարներ կարող են ձեռք բերել ԼՂՀ մշակույթի և երիտասարդության հարցերի նախարարության մշակութային ժառանգության և ժողովրդական արհեստների բաժնից (ք. Շուշի, Հախումյան 28). աշխատանքները պետք է անձնագրավորված լինեն (գործվածքի անվանումը) և ունենան հյուսողի կնիք-արձանագրությունը (բնակավայր, տարեթիվ). կազմակերպիչներին իրավունք է վերապահվում աշխատանքներն օգտագործել գովազդման և մրցույթի մասսայականացման նպատակներով:
7. Հայտերի ընդունման կարգը
Մասնակցության հայտերը ներկայացնել ԼՂՀ մշակույթի և երիտասարդության հարցերի նախարարության մշակութային ժառանգության և ժողովրդական արհեստների բաժին՝ մինչև ս. թ. հունիսի 1-ը, իսկ պատրաստի աշխատանքները՝ մինչև նոյեմբերի 1-ը:
Մրցույթի արդյունքները կամփոփվեն ս. թ. նոյեմբերին՝ ԼՂՀ մշակույթի և երիտասարդության հարցերի նախարարությունում:
Արդյունքների ամփոփումից հետո աշխատանքները կվերադարձվեն, բացառությամբ՝ մրցանակային տեղեր զբաղեցրած աշխատանքների
8. Արդյունքների ամփոփումը
Աշխատանքները քննելիս հաշվի կառնվեն սույն կարգի պահանջների կատարումը, արցախյան գորգապատկերների ու զարդանախշերի օգտագործումը, գունային ճիշտ համադրությունը, հումքի որակը և գործվածքի խտությունը:
Մրցույթի հաղթողները կորոշվեն գնահատող հանձնախմբի բոլոր անդամների կողմից տրված գնահատականների հանրագումարով:
Հավելյալ տեղեկությունների ու պարզաբանումների համար զանգահարել
(047) 73-38-98 հեռախոսահամարով:
#հայկականգորգ #ՀՀմշակույթինախարարության #Արցախ #գորգագործություն #ոչնյութականմշակութայինժառանգություն
«ԿԱԶԱ» հիմնադրամը 2019 թվականի փետրվարի 11-ից 25-ն առաջարկում է «Ազգագրություն» դասընթացը, որի ընթացքում կներկայացվեն հայկական ավանդական տարազը, ուտեստի համակարգը և ընտանիքը, ինչպես նաև վերջիններիս ժամանակակից դրսևորումները։ Դասընթացի բանախոսն է՝ Հայոց ազգագրության թանգարանի գիտական գծով փոխտնօրեն, ավելի քան 80 հոդվածների հեղինակ, պատմ. գիտ թեկնածու, ազգագրագետ Սվետլանա Պողոսյանը։ • Դասընթացի տևողությունը 3 օր՝ փետրվարի 11, 18 և 25, ժամը՝ 18:00 – 20:00։ • Դասընթացի ընդհանուր արժեքը՝ 9.000 դրամ: • Յուրաքանչյուր դասախոսության մասնակցության արժեքը՝ 3.000 դրամ։ Դասընթացի թեմաները փետրվարի 11, ժամը՝ 18:00 – 20:00 Հայկական ավանդական տարազը Հայկական տարազի համակարգը: Հայկական ավանդական տարազախմբերի բնութագրերը: Տարազի գործառույթները՝ տոնածիսական, նշանային, սոցիալական և այլն: Զարդարանքի, զարդանախշերի և գույների խորհրդիմաստները: Ազգային տարազն այսօր և նորաձևությունը։ փետրվարի 18, ժամը՝ 18:00 – 20:00 Հայկական ավանդական և ժամանակակից ուտեստի համակարգը Ուտեստի կառուցվածքը: Տոնածիսական համալիրները: Հացկերույթ և հյուրասիրություն: Սեղանապետի կերպարը հայոց մեջ։ փետրվարի 25, ժամը 18։00 – 20։00 Հայկական ավանդական և ժամանակակից ընտանիքը Հայկական ավանդական ընտանիքը: Հայկական ավանդական բնակարանը: Ավանդական բնակարանի ներքնատեսքը և կահկարասին: Տնտեսական կենցաղի առանձնահատկությունները։
Փետրվարի 12-ին, ժամը 12։00-19։00, ՀԱՅ-ԱՐՏ մշակութային կենտրոնում Սիրիահայերի Միության (Syrian Armenian Union NGO) նախաձեռնությամբ տեղի կունենա ցուցահանդես-վաճառք։
Ցուցահանդեսին մասնակցության եւ մանրամասն տեղեկության համար զանգահարել հետևյալ հեռախոսահամարներով՝
095-25-53-55 041-15-55-11
#ՍիրիահայերիՄիություն
ՈՒՇԱԴՐՈՒԹՅՈՒՆ!
Ժողովրդական արվեստի կենտրոնը փետրվարի 5-ից սկսում է ժանեկագործության նոր դասընթաց: Ժողովրդական վարպետ Անահիտ Իսունցը կսովորեցնի ժանեկագործության բոլոր գաղտնքները և դրա կիրառման ժամանակից մոտեցումները: 8 պարապունքի արժեքը՝ 16.000 դրամ է Օրերը՝ շաբաթական 2 օր, 1.30 ժամ տևողությամբ Անհրաժեշտ բոլոր նյութերը տրամադրում է կենտրոնը Մանրամասների համար զանգահարել՝ 099 519 699 և 010 569380 Հասցեն՝ Աբովյան 64 /Աբովյան պուրակ/ Մասնակցության համար հարկավոր է գրանցվել նախապես։