Posts in category: Իրադարձություններ

Օգոստոսի 10-ին Սյունիքի մարզի Սիսիան քաղաքում տեղի կունենա արդեն ավանդույթ դարձած «ՆԱՎԱՍԱՐԴ»-ը՝ Հայ-Իրանական մշակութային-խոհանոցային փառատոնը։ Փառատոնի ընթացքում մասնակից հայկական և իրանական թիմերը կմրցեն՝ իրենց տաղավարներում պատրաստելով և ներկայացնելով երկու երկրների ազգային խոհանոցի բազմազանությունն ու պատմությունը, իսկ մշակութային և երաժշտական գոտիներում կներկայացվեն երկու երկրների մշակույթը, արվեստն ու արհեստը։

Այս ամենը տեղի կունենա փառատոնի հիմնական 4 գոտիներում․ հայկական և իրանական ուտեստների պատրաստման և ներկայացման գոտի, արվեստի և արհեստագործական արտադրանքի ներկայացման գոտի, երաժշտական-գեղարվեստական մասի ներկայացման գոտի, մրցութային հանձնաժողովի գոտի:

Փառատոնի վերջում կամփոփվեն մրցույթի արդյունքները և կշնորհվեն պարգևներ հաղթողներին։

Փառատոնը կազմակերպում են Տուրիզմի Հայկական ֆեդերացիան և «Հայ Խոհարարական Ավանդույթների Զարգացման և պահպանման» ՀԿ-ն՝ ՀՀ ԷՆ զբոսաշրջության կոմիտեի աջակցությամբ, ՀՀ Սյունիքի մարզպետարանի, Սիսիանի համայնքապետարանի, ՀՀ-ում ԻԻՀ դեսպանության Մշակութային կենտրոնի եվ Կապանում Իրանի գլխավոր հյուպատոսության հետ համագործակցությամբ։

Փառատոնի մուտքն ազատ է։

Համագործակցության համար զանգահարեք՝ +374 98 63 13 39, +374 99 58 45 46։

Berry Festival հատապտուղների փառատոնի կարևորագույն նպատակը ֆերմերների, արտադրողների, վերամշակողների, գնորդների և տարբեր կազմակերպությունների ու հնարավոր ներդրողների հանդիպումն է, փորձի փոխանակումն ու համագործակցությունը՝ նպաստելով Հայաստանում կայուն գյուղատնտեսության և գյուղական համայնքների զարգացմանը, հատապտուղների մշակության արժեշղթայի կայացմանը:

Բազմաթիվ շահառու և ոչ շահառու ֆերմերներ, արտադրողներ, վերամշակողներ Շիրակի և հարակից մարզերի մի շարք համայնքներից կմասնակցեն Հատապտուղների փառատոնին, որպեսզի վայելեն գյուղական միջավայրը, արժանին մատուցեն հողի աշխատավորին և օգնեն ավելացնելու իրենց եկամուտները:

Միջոցառման ընթացքում կլինի նաև հատուկ մրցանակաբաշխություն և ցուցադրողներին կտրվեն պատվոգրեր ու մրցանակներ: Տոնը կուղեկցվի բնական ու ավանդական գյուղմթերքի տոնավաճառով, շիրակցիներին բնորոշ ջերմ ընդունելությամբ և հյուրասիրությամբ, ինչպես նաև ավանդական համերգային ծրագրով` երգիչների, երաժիշտների ու մշակութային փոքր խմբերի մասնակցությամբ, երեխաների համար նախատեսված ժամանցային կատարումներով ու ներկայացումներով, խաղերով, վարպետաց դասերով ու պարային համարներով։ Փառատոնը կանցկացվի հուլիսի 27- ին, ժամը 12։00-ին։ Վայրը՝ Շիրակի մարզ, գյուղ Հայկավան, Նոր թաղամաս 1-ին փողոց, շ.29։ Մուտքն ազատ է։

ՀՀ կրթության, գիտության, մշակույթի և սպորտի նախարարության ֆինանսական աջակցությամբ «Արդինի» կրթամշակութային և տուրիզմի զարգացման հիմնադրամը Շիրակի մարզի Արևիկ գյուղում իրականացրել է «Լավաշի կախարդանքը» փառատոնը, որը մեկնարկել էր 2023 թվականին:

Փառատոնը տեղի է ունեցել «Լավաշ. միասնականության և հզորության խորհրդանիշ» ծրագրի շրջանակում: Այն նվիրված էր լավաշ թխելու ավանդույթը 2014 թ. ՅՈՒՆԵՍԿՕ-ի մարդկության ոչ նյութական մշակութային ժառանգության ներկայացուցչական ցանկում գրանցելու 10-ամյակին:

Փառատոնի բացմանը ողջույնի խոսքով հանդես են եկել ԿԳՄՍՆ մշակութային ժառանգության վարչության պետ Աստղիկ Մարաբյանը և Շիրակի մարզպետի տեղակալ Աննա Մարտիկյանը:

Փառատոնին տեղի է ունեցել լավաշի թեմայով ստեղծված կտավների բացօթյա ցուցահանդեսի և գյումրեցի նկարիչ Լևոն Առաքելյանի հեղինակային պատ-գեղանկարի (սթրիտ-արտ) բացումը: 2023 թ. Արևիկ համայնքի մանկապարտեզի պատին պատ-գեղանկարի միջոցով պատկերվել է Գ. Խանջյանի «Հացը լեռներում» կտավը։

Ցուցահանդեսին ներկայացված էին նաև հիմնադրամի հետ համագործակցած մյուս գեղանկարիչների
աշխատանքները՝ Գյումրիից, Վանաձորից, Աբովյանից և Այնթափից, ինչպես նաև Լեռնային Ղարաբաղից բռնի տեղահանված արվեստագետների գործեր:

Այս տարի փառատոնին, բացի Արևիկ գյուղից, մասնակցում էին նաև Հայկավան, Հացիկ, Կարմրաքար, Բաշգյուղ համայնքների բնակիչները, որոնք առանձին տաղավարներով ներկայացնում էին տեղական լավաշն ու բոքոնը, իրենց արտադրած գյուղական բարիքները, համեղ ուտեստներն ու քաղցրավենիքները: Ինչպես նախորդ տարի, այս անգամ ևս երկու տաղավարով ներկայացված էին արցախյան խոհանոցը և արհեստագործությունը:

Փառատոնի համերգային մասում ելույթ են ունեցել նորաստեղծ «Ֆոլկաստիկ» բենդը, որն արդեն սիրված է գյումրեցիների, հատկապես երիտասարդների կողմից և Ախուրյանի «Մարինա» պարային համույթը, որը նաև փառատոնի մասնակիցների համար պարի ուսուցում է անցկացրել: «Վառեմ-մարեմ» արվեստանոցն իր հերթին վարպետության դաս է անցկացրել՝ հնարավորություն տալով Գյումրիի խորհրդանիշ դռների ձևավորումով հուշանվերներ պատրաստել:

«Լավաշի կախարդանքը» փառատոնն ուղղված է ոչ միայն հայկական լավաշի և այն պատրաստող կին հացթուխների
փառաբանմանը, այլև համայնքի աշխուժացմանը, երիտասարդների ներգրավվմանը ոչ նյութական մշակութային ժառանգության պահպանության գործընթացում և համայնքի կայուն զարգացման խթանմանը:

Հուլիսի 27-ին՝ ժամը 13։00-17։00-ին,երևանյան ԼՈՖԹ-ում տեղի կունենա արցախցի մեր հայրենակիցների ձեռագործ աշխատանքների ցուցահանդես-վաճառք․ ձեռագործ խաղալիքներ, պայուսակներ եւ գործավածքներ, զարդեր եւ աքսեսուարներ, արցախյան խոհանոցի յուրահատուկ ուտեստներ եւ չրային վեգան կոնֆետներ։ Ցուցահանդես- վաճառքի ընթացքում՝ ժամը 14:00-ին, նախատեսված է մուլտֆիլմի ցուցադրություն մեծ էկրանին (հայերեն հնչունավորմամբ), ինչպես մասնակիցների, այնպես էլ այցելուների երեխաների համար (անվճար): Հասցե՝ Մոսկովյան 3։ Մուտքն ազատ է։ Իրադարձությունը չունի տարիքային սահմանափակում։ Տոնավաճառն իրագործվում է ԼՈՖԹ ՀԿ-ի և ՀՀ Կառավարության համատեղ «Աջակցություն Լեռնային Ղարաբաղից տեղահանված բնակչության սոցիալականացմանը» ծրագրի շրջանակում։

ՀՀ կրթության, գիտության, մշակույթի և սպորտի նախարարության ֆինանսական աջակցությամբ «Արդինի» կրթամշակութային և տուրիզմի զարգացման հիմնադրամը հուլիսի 21-ին Շիրակի մարզի Արևիկ գյուղում կանցկացնի «Լավաշի կախարդանքը» փառատոնը:

«Լավաշի կախարդանքը» փառատոնն առաջին անգամ անցկացվել է 2023 թվականին: Այս տարի փառատոնը նվիրվում է հայկական լավաշ թխելու ավանդույթը 2014 թ. ՅՈՒՆԵՍԿՕ-ի մարդկության ոչ նյութական մշակութային ժառանգության ներկայացուցչական ցանկում գրանցելու 10-ամյակին:

Փառատոնի ընթացքում տեղի կունենան տարբեր մշակութային միջոցառումներ՝ լավաշի թեմայով բեմականացում և գեղանկարների ցուցահանդես, պատ-գեղանկարի (սթրիթ արտ) ստեղծում, կարպետագործության և ուլունքագործության վարպետաց դասեր, Գյումրու հուշանվեր-դռների պատրաստում, երեխաների համար՝ կավճանկարչություն և երաժշտություն՝ նորաստեղծ «Ֆոլկաստիկ» բենդի կատարմամբ:

Գյուղական մթերքներով լի տաղավարները կներկայացնեն ոչ միայն Արևիկ, այլև հարակից գյուղերը՝ Շիրակի մարզի Հայկավան, Հացիկ, Փոքրաշեն, Կարմրաքար, Բաշգյուղ: Տեղի կունենա լավաշի և այլ ուտեստների համտես, կներկայացվի նաև արցախյան խոհանոցը։

Փառատոնի հիմնական նպատակը Արևիկ համայնքի լավաշի թխման ավանդույթի վերարժևորումն ու հանրահռչակումն է, ոչ նյութական մշակութային ժառանգության պահպանության և իրազեկման միջոցով համայնքային կյանքի աշխուժացումը, գաստրո, էթնո և էկո զբոսաշրջության զարգացման խթանումը:

Նշենք, որ փառատոնի առանցքում և՛ գյուղը, և՛ փառաբանման առարկան՝ լավաշը, պատահական չեն ընտրվել: Արևիկը դեռևս խորհրդային տարիներից հռչակված է եղել հացթուխներով և կարմրահատ ցորենից թխվող լավաշով, ուստի փառատոնի հիմնական ուղերձը թոնրում ավանդական եղանակով թխվող լավաշ հացի փառաբանումն է: 2023 թվականին պատ-գեղանկարի միջոցով Արևիկ համայնքի մանկապարտեզի պատին պատկերվել է Գ. Խանջյանի «Հացը լեռներում» կտավը։

Նախորդ տարվա փառատոնին կարելի է ծանոթանալ հետևյալ հղումով` https://www.youtube.com/watch?v=NohxmzdTo-A ։

Ժողովրդական արվեստի հանգույց հիմնադրամի փոքրիկ գորգագործների 2023-2024թթ․ խումբն ավարտեց իր դասընթացները, և հուլիսի 13-ին կայացավ երեխաների ստեղծագործ գորգերի ծնունդը։ Հիմնադրամը լիահույս է, որ այս փոքրիկ գորգերը կմնան դասընթացի մասնակիցների համար դեպի ավանդական ժառանգությանը տանող ուղեցույց։ Հիմնադրամում երեխաների համար անցկացվող անվճար գորգագործության դասընթացները շարունակվում են։ Դասընթացները հիմնադրամում գործում են 2014 թվականից և եթե ցանկանում եք աջակցել, կարող եք գնել սաների կողմից հյուսված գորգերը՝ անցնելով հղումով https://folkartshub.com/hy/join-us ։

ՀՀ կրթության, գիտության, մշակույթի և սպորտի նախարարության ֆինանսական աջակցությամբ իրականացվել է «Ափդեյթ 4. երգվող երգեր» ծրագիրը, որն ամփոփվել է Գեղարքունիքի մարզի Գավառ, Մարտունի, Վարդենիս և Սևան համայնքներում համերգային շրջագայությամբ:

«Ափդեյթ 4. երգվող երգեր» ծրագրի շրջանակում երաժիշտ մասնագետի խորհրդատվությամբ մշակվել են և տեղացի երաժիշտների ու «ԳԱՄՄԱ» բենդի մասնակցությամբ ձայնագրվել են ժողովրդական երգեր՝ հանրայնացնելով տեղական ոչ նյութական մշակութային ժառանգությունը՝ ժողովրդական երգերը:

Ծրագրի նպատակն էր կենսունակություն հաղորդել Սևանի ավազանի համայնքներում վերջին 3 տարիներին իրականացված ծրագրերի արդյունքում գրանցված երգերին՝ ապահովելով ոչ միայն տեղական երգային բանահյուսության պահպանությունը, այլև փոխանցումն ու տարածումը։ Ծրագիրն իրականացրել է «Սևան» երիտասարդական ակումբ» հասարակական կազմակերպությունը:

Համեցեք Ջրվեժ համայնքում իրականացվող ավանդական պարի ամենամսյա բաց դասին։ Այս անգամ միայն պարուսուցում չէ, նաև ավանդական Վարդավառի տոնախմբություն է։ Վարդավառը միայն ջրոցին չէ, այն պարունակում է շատ գեղեցիկ, բայց արդեն մոռացված ծիսակատարություններ։ Պատրաստելու եք տոնի ծիսական տիկնիկ, քայլելով շրջելու եք տնից տուն, Խնդում (ծիսական ծառ) եք պատրաստելու, պարեցնեք և իրար ջրեք` անձրև ու առատություն ստանալու ակնկալիքով ։ Եթե ուզում եք դառնալ ավանդական Վարդավառի մասնակից, վերցրեք ձեր դույլերը և միացեք։ Հանդիպումը կկայանա հուլիսի 5–ին, ժամը 17:00-ին։ Վայրը` Ջրվեժի համայնքապետարանի վարչական շենքի հարակից տարածք։ Օրվա հյուր` Ռուդիկ Հարոյանի անվան Մասունք ավանդական երգի-պարի համույթ։ Կազմակերպիչներ` Ջրվեժի համայնքապետարան և Անանենց Արվեստանոց։

Գյումրու համայնքապետարանի նախաձեռնությամբ հուիսի 20-ին Գյումրիում անցկացվելու է Պանրխաշի փառատոն։

Փառատոնին մասնակցել կարող են Գյումրիում սննդի ծառայություն մատուցող կազմակերպությունները: Հայտերն ընդունվում են մինչեւ հուլիսի 12-ը ներառյալ:

Առավել մանրամասն տեղեկության և հարցերի համար կարող եք զանգահարել. 031222236, 098978958։