tum-mus

Հանրապետության մի քանի թատրոններ և թանգարաններ կվերանորոգվեն

Իրադարձություններ

Գործադիրը փոփոխություններ է կատարել «ՀՀ 2019 թ. պետական բյուջեի մասին» ՀՀ օրենքում և ՀՀ կրթության, գիտության, մշակույթի և սպորտի նախարարությանը ՀՀ 2019 թ. պետական բյուջեի հարկային եկամուտներից հատկացնել 690 մլն 688.3 հազար դրամ:

Գումարը նախատեսվում է ուղղել 6 մշակութային կազմակերպությունների՝ Վանաձորի Հ. Աբելյանի անվան պետական դրամատիկական թատրոնի, Գորիսի Վ. Վաղարշյանի անվան դրամատիկական թատրոնի, Գ. Սունդուկյանի անվան ազգային ակադեմիական թատրոնի, Հայաստանի ազգային պատկերասրահի, Հայաստանի ազգային պատկերասրահի մասնաճյուղ Ա. Սարգսյան և Հ. Կոջոյան տուն-թանգարանի, Հ. Թումանյանի թանգարանի շենքային պայմանների բարելավմանը, Պատմամշակութային արգելոց-թանգարանների և պատմական միջավայրի պահպանության ծառայության «Գառնի» պատմամշակութային արգելոց-թանգարանի տարածքում «Բաղնիք» և «Խճանկար» հուշարձանների նորոգմանը և ամրակայմանը, ինչպես նաև հուշարձանախմբերի կամ առանձին զբոսաշրջային գրավչության տարածքներում QR կոդերով բազմալեզու ցուցանակների տեղադրմանը

Որոշման նպատակը 6 մշակութային կազմակերպությունների՝ թանգարանների և թատրոնների բնականոն գործունեության ապահովումն է, ինչպես նաև հանրապետության հուշարձանների պահպանման, օգտագործման, հանրահռչակման և զբոսաշրջային գրավչության բարձրացումը։

Վարչապետ Նիկոլ Փաշինյանն ուրախալի համարեց որոշման ընդունումը և, միաժամանակ. ՀՀ կրթության, գիտության, մշակույթի և սպորտի նախարարի ուշադրությունը հրավիրել այն հարցի վրա, որ մշակութային հաստատությունները նույնպես պետք է ակտիվ գործունեություն ծավալեն:

«Մենք հիմա խոսում ենք զբոսաշրջության աճի մասին։ Մենք ծրագրեր ենք իրականացրել, որով ապահովում ենք երեխաների, դպրոցականների այցելությունները թատրոններ, թանգարաններ, համերգասրահներ, և մենք այսպիսի կապիտալ ծախսեր ենք իրականացնում մշակութային օջախներում, թանգարաններում, թատրոններում և այլն: Բայց մենք պետք է նաև այդ մշակութային օջախների առաջ խնդիր դնենք, որ նրանք ապրեն ավելի ակտիվ կյանքով: Պետք է ունենան ծրագիր՝ այցելությունների թիվը, տոմսերի վաճառքների թիվը, սեփական եկամուտներն ավելացնելու: Անցած տարի, երբ ես ուզեցի թանգարանների այցելությունների վիճակագրությունը, տեսա, որ մեր երկրում կան թանգարաններ, ուր, կարելի է ասել, գործնականում մարդ չի այցելում, և այդտեղից հարց է ծագում՝ ինչո՞ւ ենք մենք պետական բյուջեից միջոցներ վատնում թանգարան պահելու համար, ուր մարդ չի այցելում: Այսինքն՝ եթե թանգարան է, կանխավարկածն այն է, որ այդտեղ պահվում են ցուցանմուշներ, որոնք կարևոր են և ունեն հետաքրքրություն: Մենք այստեղ պետք է շատ ուշադիր լինենք. թանգարանային ոլորտում, իմ կարծիքով, պետք է շատ լուրջ, շատ խիստ քաղաքականություն վարենք՝ նաև հետագայի առումով, որովհետև իսկապես պետք է այդ օջախները գործեն, ապրեն և գեներացնեն եկամուտներ: Պետք է լինեն կրեատիվ մարդիկ, ովքեր կարողանան թանգարանները և մշակութային օջախներն իսկապես դարձնել մշակութային կյանքի կենտրոններ», – «Արմենպրես»-ի փոխանցմամբ, նշեց կառավարության ղեկավարը:

Վարչապետը նաև հավելեց՝ պետք է հակառակն էլ արձանագրել, որ Հայաստանում կան մի քանի թանգարաններ, որոնք մարդկանց մշտական հոսքեր են ապահովում, և մարդկանց այցելությունները դեպի այդ թանգարաններ գնալով շատանում են: Պետք է այդ փորձն ուսումնասիրել, ինստիտուցիոնալ դարձնել և տարածել այլ թանգարանների և մշակութային օջախների վրա:

xoceli-xmbi-erexaner

Խոցելի խմբերի երեխաների աշխատանքները կցուցադրվեն Խնկո Ապոր անվան գրադարանում

Իրադարձություններ

Խնկո Ապոր անվան ազգային մանկական գրադարանում խոցելի խմբերի երեխաների համար նախատեսված մանկապատանեկան ստեղծագործական ամառային դպրոցը ներառել է ավելի քան 60 շահառուների:

Հունիսի 3-ին մեկնարկած ծրագիրը երեխաներին հնարավորություն է տվել ամառային արձակուրդը լցնել կրթամշակութային բովանդակությամբ: Հաշմանդամություն ունեցող, սոցիալապես անապահով, միակողմանի ծնողազուրկ, բազմազավակ ընտանիքների, զոհված զինծառայողների, ինչպես նաև սահմանապահների 7-15 տարեկան երեխաներն անվճար հիմունքներով մասնակցում են ամառային դպրոցի կողմից առաջարկվող նկարչության, խեցեգործության, ուլունքագործության և ասեղնագործության, տիկնիկագործության և թատերական խմբակներին:

Ամռան ավարտին գրադարանում կկազմակերպվի նաև Հովհաննես Թումանյանի 150-ամյակին նվիրված ցուցահանդես՝ խմբակ հաճախող երեխաների աշխատանքների ցուցադրությամբ: Թեման Թումանյանի գրական ժառանգությունն է: Երեխաները նկարում, կավից պատրաստում են Թումանյանի հեքիաթների հերոսներին, իրենք են հայտվում այդ հեքիաթների կերպարներում՝ թատերական խմբակի շրջանակում մարմնավորելով այս կամ այն հերոսին:

Երեխաները խմբակներ են հաճախում մեծ սիրով ու հետաքրքությամբ: Սա փաստեցին բոլոր 5 խմբակների մանկավարժները: Ուլունքագործության խմբակի մանկավարժ Անուշ Այվազյանը երեխաներին հանձնարարել է հայկական խորհրդանիշների կրծքանշան պատրաստել. «Փորձում ենք կրծքանշան պատրաստել՝ ծիրան, դրոշ, անմոռուկ, նուռ: Երեխաները սիրով են աշխատում, հաճույքով լսում: Սա մանր աշխատանք է, որն ուշադրություն է պահանջում»,-ասաց նա:

8 տարեկան Նարեն ասում է, որ սիրում է ասեղնագործել. «Տանն ասեղնագործում եմ, մայրիկն է սովորեցրել: Ուզում եմ վարդեր ասեղնագործել և նվիրել իմ տատիկին»: 8 տարեկան Գաբրիելան դրոշ է պատրաստում. «Այս խմբակն ինձ տալիս է ճկունություն, արագ աշխատելու ու ձգտելու հմտություն»:

Նկարչության խմբակի ուսուցչուհի Թեհմինե Մայիլյանի խոսքով՝ նկարներից ու երեխաների դեմքից զգում է ուրախությունը: 11-ամյա Հայկը «Շունն ու կատուն» է նկարում: Ասում է՝ այստեղ գույներ ստանալ է սովորել: 14 -ամյա Գուրգենը վիշապ է նկարում: Նա հետաքրքրված է չինական դիցաբանությամբ:

Կավագործության ուսուցչուհի Արևիկ Արևշատյանը երեխաներին բացատրում է ինչպես աշխատել, թրծել կավը: 13-ամյա Մանյան մանկուց երազել է կավով աշխատելու մասին: «Ինձ շատ է հետաքրքրել, թե ինչպես են պատրաստում: Ամռան վերջին ցուցահանդեսն է, երջանկություն է, ես երազել եմ շատ ցուցահանդես լինի, մասնակցեմ»,-ասում է Մանյան:

11-ամյա Արթուրը «Շունն ու կատուն» է պատկերում: Նա կավով աշխատելու փորձ ունի: «Մենք սարի վրա կավ էինք հավաքում: Ընկերներով 5 ժամ սար էինք բարձրանում, կավ գտնում ու փորձում աշխատել նրանով»:

Տիկնիկագործության խմբակում, ըստ մանկավարժ Արմինե Արևշատյանի, 4 կարի տեսակ են սովորում, որպեսզի կարողանան տիկնիկ կարել:

Թատերական խմբակը ղեկավարում է դերասան Ստեփան Շահինյանը: Բեմադրում են Հովհաննես Թումանյանի «Չարի վերջը» և «Սուտասանը» հեքիաթները: Երեխաները նշում են, որ բեմադրությունները շատ հետաքրքիր են անցնում: 8-ամյա Գագիկի մայրն ասում է, որ որդու հաճախելու ցանկությունը շատ մեծ է, նրան բեմը գրավում է: Որդին միջամտում է. «Դերասան եմ ուզում դառնալ»:

Ստեփան Շահինյանի խոսքով՝ անցած մեկուկես ամսում երեխաները շատ են փոխվել. «Նախկինում ավելի կաշկանդված էին, հիմա ավելի «հանդուգն» են: Ցանկացած թատերական խմբակ տարեք երեխայի, ով փակ է, կաշկանդված, որոշ ժամանակ անց դառնում են անկաշկանդ: Կարող է առաջնորդ չդառնան, բայց դառնան մեկը, ում կարծիքը թանկ է կողքինների համար»: Նշենք, որ մանկապատանեկան ստեղծագործական ամառային դպրոցն անցկացվում է Հայաստանի Կրթության, գիտության, մշակույթի և սպորտի նախարարության աջակցությամբ:

hushardzan

Լույս է տեսել «Աղնջաձոր, Թառաթումբ, Քարագլուխ, Սալլի գյուղերի պատմական հուշարձանները» գիրքը

Իրադարձություններ

Հուշարձանագետ Սամվել Կարապետյանը ֆեյսբուքյան իր էջում գրել է. «Լույս է տեսել «Աղնջաձոր, Թառաթումբ, Քարագլուխ, Սալլի գյուղերի պատմական հուշարձանները» գիրքը (ստեղծման և տպագրության հովանավոր՝ «Վայրի բնության և Մշակութային արժեքների պահպանության հիմնադրամ»)»:

karmir-berd

«Հայոց զենքի փառքի օր» միջոցառումը՝ Կոտայքի մարզի Կարմիր բերդի տարածքում

Իրադարձություններ

Հունիսի 9-ին ՀՀ Կոտայքի մարզի Կարմիր բերդի տարածքում տեղի ունեցավ «Հայոց զենքի փառքի օր» միջոցառումը, որի հիմնադիրն ու կազմակերպիչն էր «Վերելք» միությունը։ Միջոցառման ընթացքում ելույթներով հանդես եկան անվանի մտավորականներ, զինվորականներ, մշակույթի ոլորտի ներկայացուցիչներ։ Հայոց պատմության ընթացքում տեղի ունեցած հիշարժան մարտերի մասին հետաքրքիր տեղեկություններ ներկայացրին «Վերելք» միության հիմնադիր-անդամ, գրող-հրապարակախոս Արծրուն Պեպանյանը, Արցախյան պատերազմի մասնակից, պատմաբան Արթուր Եղիազարյանը, Արցախյան պատերազմի մասնակից, «Կարին» ավանդական երգի-պարի խմբի գեղարվեստական ղեկավար Գագիկ Գինոսյանը, Ապրիլյան պատերազմի մասնակից Ժորա Աֆրիկյանը։

 

Հեքիաթագետ Հայկ Կիրակոսյանը խոսեց հայ ժողովրդական հեքիաթներում և էպոսում հայոց զենքի խորհրդի մասին, մեր կյանքում հեքիաթի կարևորության մասին, ինչպես նաև հայերի՝ սեփական ոգին չճանաչելու ու առաքելությունը մոռանալու մասին։ «Վերելք» միության անդամ Վրույր Արծրունին հակիրճ ներկայացրեց Կարմի բերդ հնավայրի պատմությունը։ Տեղեկատվական պայքարի մասնագետ, ԱԱԾ պահեստազորի փոխգնդապետ Իվան Պողոսյանը նշեց, թե որքան կարևոր է պատանիների զինվորական պատրաստության բարձրացումը՝ պատերազմներում մեծ թվով զոհերից խուսափելու համար։ Նա հույս հայտնեց, որ զինվորական պատրաստության ուսումնական նոր ծրագիրը, որի հեղինակն է, ոչ հեռու ապագայում կներառվի ՀՀ հանրակրթական հիմնական ընդհանուր պետական ծրագրում։ Կարդացեք նաև Մրցույթ. «Դիմում եմ տանը ինձ սպասող մորս, կնոջս, քրոջս, սիրածս աղջկան» Ազգագրական պարերի տոնական շքերթ` Ազատության հրապարակում «Ամենաթույլ օղակը դիվանագիտությունն է». Գագիկ Գինոսյան «Կարին» և «Անդոկ» ավանդական երգի-պարի խմբերի ռազմապարերը մեծ շուք հաղորդեցին միջոցառմանը՝ հայոց անկոտրում ոգու խռովքն ու ուժը փոխանցելով հանդիսատեսին։

Հայկական ավանդական կոխ ըմբշամարտի ցուցադրական ելույթն էլ ևս մեկ անգամ փաստեց, որ մարտարվեստն իր բոլոր դրսևորումներով եղել է հայոց մշակույթի կարևոր բաղկացուցիչը։ Հայկական կոխի ֆեդերացիայի պատասխանատու քարտուղար Բագրատ Երիցյանը շեշտեց, որ մեր երիտասարդ ըմբիշների միջազգային հաջողությունները մեծապես պայմանավորված են ազգային ավանդույթներով և ավանդաբար փոխանցված գիտելիքով։ Միջոցառման ավարտին ներկաները ոգեկոչեցին Արցախյան պատերազմում և Ապրիլյան մարտերում իրենց կյանքը զոհած տղաներին։ «Բոլորդ տեղյակ եք 300 սպարտացիների մասին, բայց, համոզված եմ, որ քչերդ գիտեք 300 հայերի մասին, որոնք Ակոռի գյուղի մոտ դուրս եկան թշնամու 7000-անոց բանակի դեմ և փախուստի մատնեցին նրան։

mshakuytti-orer

Հայկական մշակույթի օրերը Մոսկվայում․ մայիսի 27-ին մեկնարկեց Հայկական մշակույթի օրերի միջոցառումների

Իրադարձություններ

«Armenian Assembly» հասարակական կազմակերպությունը ՌԴ-ում Հայաստանի Հանրապետության դեսպանության, ինչպես նաև Ռուսաստանի ու Նոր Նախիջևանի Հայ առաքելական եկեղեցու թեմի մասնակցությամբ և աջակցությամբ սույն թվականի մայիսի 27-ից հունիսի 1-ն անցկացնում է Հայկական մշակույթի օրերը Մոսկվայում:

 Մոսկվայում Հայկական մշակույթի օրերի հանդիսավոր բացումն ազդարարվեց Պ․Չայկովսկու անվան Մոսկվայի կոնսերվատորիայի համերգային դահլիճում կազմակերպված՝ մաեստրո Տիգրան Մանսուրյանի 80-ամյակին նվիրված հոբելյանական հեղինակային երեկույթով: Տիգրան Մանսուրյանը ստեղծագործում է տարբեր երաժշտական ժանրերում, նա հայկական կինոֆիլմերի համար գրված սիրված մեղեդիների հեղինակ է:
 

Համերգին մասնակցում էին “Musica Viva” կամերային նվագախումբը Ալեքսանդր Ռուդինի ղեկավարությամբ, Տուլայի պետական երգչախումբը Ալեքսանդր Սոլովյովի ղեկավարությամբ, “Questa Musica” երգչախումբը, ինչպես նաև հանրահայտ երաժիշտներ Սերգեյ Պոլտավսկին(ալտ), Պավել Դոմբրովսկին (դաշնամուր), Մարիամ Ավետիսյանը (սոպրանո)։

 Տոնական համերգի պատվավոր հյուրերն էին «Armenian Assembly»-ի Կանանց նախաձեռնությունների կոմիտեի անդամներ Իրինա Պոչիտայևան, Ելենա Ծատուրովան, Արմինե Ղազարյանը, Նորարար տեխնոլոգիաների և գիտության կոմիտեի անդամ Սերգեյ Ազատյանը, լիբանանահայ գործարար, «Մայրիգ» ռեստորանների ցանցի սեփականատեր Ալին Կամակյանը և GOURMET FEST գաստրոնոմիկ միջոցառմանը հրավիրված ռեստորանային ոլորտի ներկայացուցիչներ, ինչպես նաև Հայաստանից և այլ երկրներից ժամանած, Հայկական մշակույթի օրերի միջոցառումների մասնակիցներ:
 

Մոսկվայում Հայկական մշակույթի օրերի շրջանակում նախատեսված միջոցառումներն են.

 2019 թվականի մայիսի 28, ժամը 18.00, «Armenian Assembly» ՀԿ-ի նախագահության խորհրդի նիստ. նիստի ընթացքում մասնակիցները ամփոփեցին «Armenian Assembly»-ի 2018-2019 թթ. գործունեության արդյունքներն ու քննարկեցին հաջորդ՝ 2019-2020 թթ.-ի նպատակներն ու ծրագրերը․ Armenia Guide զբոսաշրջային պորտալի և Հայ Առաքելական Եկեղեցու միասնական էլեկտրոնային հարթակի զարգացումը, GOURMET FEST խոշոր գաստրոնոմիկ միջոցառման մեկնարկը, տարածաշրջանային կրթական կենտրոնների բացումը և մշակույթի, նորարար տեխնոլոգիաների և սպորտի ոլորտներում այլ նախաձեռնություններ:
 

2019 թվականի մայիսի 28, ժամը 19.00, GOURMET FEST յուրօրինակ գաստրոնոմիկ միջոցառում. միջոցառման նպատակը հայկական խոհանոցի ճանաչելության ապահովումն է ամբողջ աշխարհում: Առաջին անգամ Միշլեն աստղ ունեցող ռեստորանների երկու հայտնի շեֆ-խոհարարներ Կարեն Թորոսյանի (Bozar ռեստորան, Բրյուսել, Բելգիա) և Ստեֆանո Չիոտիի(Nostrano ռեստորան, Պեզարո, Իտալիա) ղեկավարությամբ և Հայաստանի առաջատար ռեստորանների խոհարարների հետ համատեղ (Չինար,The Club, Մայրիգ, Լավաշ) կստեղծվի հատուկ ճաշացանկ՝ առանձնահատուկ ֆյուժն՝ հայկական ավանդական և բարձր խոհանոցի համադրությամբ՝ հիմնված հայկական խոհարարական ավանդույթների և եվրոպական խոհանոցի տեխնիկաների վրա:

 2019 թվականի մայիսի 29, «Armenian Assembly» ՀԿ-ի Նորարար տեխնոլոգիաների և գիտության կոմիտեի ներկայացուցիչների հանդիպումը: Կոմիտեի հիմնական նպատակը ՏՏ ոլորտում սոցիալ-ձեռնարկատիրական և գիտական նախագծերի մշակումն ու զարգացումն է, որոնք կնպաստեն ազգային ինքնության, լեզվի և մշակույթի, համայնքների ամրապնդմանն ու զբոսարջության զարգացմանը Հայաստանում: Հանդիպման ընթացքում Նորարար տեխնոլոգինաերի և գիտւթյան կոմիտեի անդամներ Սերգեյ Ասլանյանը, Սերգեյ Ազատյանը, Կարեն Միրզոյանը, Ստեփան Չիտիպահովյանը, Սամվել Լազարյանը և Նոբել Արուստամյանը կքննարկեն և կսահմանեն «Armenian Assembly»-ի տեսանկյունից հեռանկարային նախաձեռնությունները 2019-2020թթ. համար:
 

2019 թվականի մայիսի 30, 18:00, Մոսկվայում Հայկական մշակույթի օրերի շրջանակում«Armenian Assembly»-ն, ի պատիվ Լազարևների տոհմի 300-ամյակի, կիրականացնի ՌԴ-ում ՀՀ դեսպանատան վերակառուցված Հյուպատոսական բաժնի բացման հանդիսավոր արարողությունը: Վերակառուցված Հյուպատոսական բաժնի բացմանը ներկա կլինեն ՌԴ-ում ՀՀ դեսպան Վարդան Տոգանյանը, ՌԴ-ում ՀՀ հյուպատոս Արա Մնացականյանը, ինչպես նաև «Armenian Assembly»-ի անդամներ:

 Հայկական մշակույթի օրերի միջոցառումների շարքը կամփոփվի հունիսի 1-ին՝ Տրետյակովի պետական պատկերասրահում ՌԴ-ում ՀՀ դեսպանատան կողմից կազմակերպված հայ մուլտիպլիկատորների՝ Հովհաննես Թումանյանի հեքիաթների մոտիվներով ստեղծված մուլտֆիլմերի ցուցադրությամբ՝ նվիրված Երեխաների պաշտպանության միջազգային օրվան:
 
«Armenian Assembly» ՀԿ-ն և Մոսկվայում Հայկական մշակույթի օրերի կազմակերպիչները լիահույս են, որ իրականացվող միջոցառումները հայկական սփյուռքի ներկայացուցիչների, ինչպես նաև սփյուռքից դուրս հաջողակ և հեղինակություն ունեցող մարդկանց միջև կապերի ամրապնդման հարթակ կդառնան, միաժամանակ կնպաստեն Հայաստանի իմիջի բարձրացմանը, ազգային ինքության պահպանմանը, բազմադարյան մշակույթի և հնագույն լեզվի հանրահռչակմանը:
 

«Armenian Assembly» հասարակական կազմակերպություն է, որի նպատակը Հայաստանում և Սփյուռում մշակույթի, կրթության, զբոսաշրջության և տեղեկատվական տեխնոլոգիաների ոլորտներում սոցիալ-ձեռնարկատիրական նախագծերի աջակցությունն ու իրականացումն է:

 «Armenian Assembly» իր ակտիվ գործունեության առաջին տարվա ընթացքում իրականացրել և աջակցել է մշակութային, կրթական, կրոնական-լուսավորչական, զբոսաշրջային և այլ նախագծեր:
asexnagorcutyun

«Ին-Տուր» էքսպոյի շրջանակներում «Իմ Հայաստան» ծրագիրը ներկայացրեց մշակութային զբոսաշրջության ներուժը

Իրադարձություններ

Ապրիլի 26-28-ը տեղի ունեցավ «Ին-Տուր» էքսպոն (Մերգելյան ինստիտուտի տարածք, Հ․Հակոբյան 3), որտեղ «Իմ Հայաստան» ծրագիրը ներկայացրեց մշակութային զբոսաշրջության ներուժը մարզերում։ Տարբեր վարպետաց դասերի միջոցով այցելուները հնարավորություն ունեցան ծանոթանալու ժողովրդական արհեստների հմտություններին և զրուցելու մարզերից ժամանած արհեստագործների հետ։

gorgeri-cucahandes

Գորգերի ցուցահանդես

Իրադարձություններ

Ապրիլի 20-ին Երևանի «Մետաքսի ճանապարհ» հյուրանոցում տեղի ունեցավ ժողովրդական արվեստի «Հանգույց» հիմնադրամի և ԱՄՆ-ի «Հայկական գորգեր» միության «Տորքի որդեգրում» համատեղ ծրագրի շրջանակում 2016-2018 թթ. ՀՀ շուրջ 13 համայնքներում գործված գորգերի ցուցահանդեսի բացումը և ազգագրագետ Ժ. Խաչատրյանի «Հայ ժողովրդական տոները և ծիսական տիկին-տիկնիկները» գրքի շնորհանդեսը։ Միջոցառման ընթացքում պարգևատրվեցին և առանձնացվեցին ինքնատիպ աշխատանքներն ու ստեղծագործությունները: Միջոցառմանը մացնակցում էր նաև Մրգաշեն համայնքի ղեկավարի տեղակալ Աննա Մուրադյանը: Ակնկալում ենք, որ հաջորդ ցուցահանդեսներին իրենց պատվավոր տեղը կունենան Մրգաշեն համայնքում գործված գորգերը:

344589_f4852e2bbcff4fc295220d3177e7ce36_mv2 (1)
344589_2d3eebce2c284f53892d9472f7a54d86_mv2
344589_3b0ec13056ac4e2894b73b584c7bbe56_mv2
344589_ec57ecb0a7534c41931b658778bb9e99_mv2
megeryan

Մեգերյան Կարպետ Ընկերությունը և Տերյան Մշակութային Կենտրոնը King Abdulaziz Camel Festival-ին ներկայացրեցին Հայաստանը

Իրադարձություններ

Մեգերյան Կարպետ Ընկերությունը և Տերյան Մշակութային Կենտրոնը King Abdulaziz Camel Festival-ին ներկայացրեցին Հայաստանը

Մեգերյան Կարպետ Ընկերությունը և Տերյան Մշակութային Կենտրոնը Սաուդյան Արաբիայի Թագավորությունում ընթացող King Abdulaziz Camel Festival-ին ներկայացրեցին Հայաստանը իր հարուստ մշակույթով։ Արդյունքում Հայաստանը պարգևատրվեց հետևյալ մրցանակով ՝ լավագույն <էթնո տուն>։

tadeos-vanq

ՀՀ ՈՆՄԺ արժեքների ցանկը համալրվեց «Սուրբ Թադեոս առաքյալի վանքի ուխտագնացությունը» արժեքով

Իրադարձություններ

Հայաստանի Հանրապետության` ոչ նյութական մշակութային ժառանգության արժեքների ցանկը համալրվեց «Սուրբ Թադեոս առաքյալի վանքի ուխտագնացությունը» արժեքով

 

Որպես համաքրիստոնեական կանգուն հնագույն սրբատեղի և իբրև համամարդկային մշակութային արժեք՝ 1955 թվականից վանքը ներառված է Իրանի պատմական հուշարձանների, իսկ 2008 թ. ՅՈՒՆԵՍԿՕ-ի համաշխարհային ժառանգության ցանկերում «Իրանի հայկական վանական համալիրները» անվանակարգով: «Սուրբ Թադեոս առաքյալի վանքի ուխտագնացությունը» տարրի գրանցմամբ կարժևորվի նյութական և ոչ նյութական մշակութային ժառանգության համատեղ պահպանությունն ու կենսունակության ապահովումը, ինչպես նաև հայ-իրանական մշակութային համագործակցությունը:

msh-nax-logo

Հայաստանի Հանրապետության` անհապաղ պաշտպանության կարիք ունեցող ոչ նյութական մշակութային ժառանգության ցանկերի գրանցման ու կազմման չափորոշիչները

Իրադարձություններ

2019 թ. փետրվարի 21-ին ՀՀ կառավարության կողմից հավանության արժանացավ «Հայաստանի Հանրապետության կառավարության 2011 թվականի հունվարի 20-ի N 36-Ն որոշման մեջ լրացումներ կատարելու մասին» որոշման նախագիծը: «Հայաստանի Հանրապետության` անհապաղ պաշտպանության կարիք ունեցող ոչ նյութական մշակութային ժառանգության ցանկերի գրանցման ու կազմման չափորոշիչները և դրանց հիման վրա կազմված ոչ նյութական մշակութային ժառանգության արժեքների ցանկը» հաստատվել է ՀՀ կառավարության 2011 թվականի հունվարի 20-ի N 36-Ն որոշմամբ: Ներկա որոշմամբ Հայաստանի Հանրապետության անհապաղ պաշտպանության կարիք ունեցող ոչ նյութական մշակութային ժառանգության արժեքների առկա ցանկը համալրվեց, որի անհրաժեշտությունը պայմանավորված է ՅՈՒՆԵՍԿՕ-ի 2003 թվականի «Ոչ նյութական մշակութային ժառանգության պաշտպանության մասին» կոնվենցիայի և Հայաստանի Հանրապետության՝ «Ոչ նյութական մշակութային ժառանգության մասին» օրենքի դրույթներով: Սույն որոշմամբ Հայաստանի Հանրապետության ոչ նյութական մշակութային ժառանգության արժեքների ցանկը, որը կազմված է 7 տարրերից («Կարոս խաչ» վիպերգ, «Լարախաղացություն (փահլևանի խաղեր), «Վիճակի երգեր», «Ավետիս», «Խաչբուռ», «Ասեղնագործություն», «Բարեկենդան»), համալրվեց ևս 5-ով: Դրանք են՝ «Որդան կարմիր. հայկական որդանին առնչվող ավանդական գիտելիքներ, հմտություններ և փորձառություն», «Գյումրվա կլկլան (մուշուրբա)», «Ստվերների տիկնիկային թատրոն», «Պարկապզուկ (տիկ)», «Կոխ ըմբշամարտ» արժեքները: Հիշեցնենք, որ Հայաստանի Հանրապետության ոչ նյութական մշակութային ժառանգության արժեքների ցանկերում գրանցված տարրերը ՅՈՒՆԵՍԿՕ են ներկայացվում ՀՀ մշակույթի նախարարին կից ոչ նյութական մշակութային ժառանգության հարցերի մասնագիտական խորհրդում քննարկվելուց և ՀՀ Արտաքին գործերի նախարարության Հայաստանի ՅՈՒՆԵՍԿՕ-ի ազգային հանձնաժողովի հավանությանն արԺանանալուց հետո միայն:

 

Նաիրա Կիլիչյան