All posts by : ICH ARMENIA

«Ժողովրդական արվեստի հանգույց» հիմնադրամը մշակել է արհեստով, արվեստով, ազգային տարրերով հագեցված ամառային դպրոցի ծրագիր երեխաների համար՝ հունիսի 30-ից հուլիսի 4-ը։ Հնգօրյա դպրոցի ընթացքում երեխաները ծանոթանալու են կավագործության, կարպետագործության, գորգագործության, նկարչության, թաղիքագործության, ծղոտագործության արհեստներին, սովորելու են ավանդական մոռացված խաղեր, երգեր ու պարեր։ Ծրագիրը նախատեսված է 6-ից բարձր տարիքային խմբի երեխաների համար։ Հավելյալ հարցերի դեպքում կարող եք զանգահարել 077031195 հեռախոսահամարով։

Մայիսի 17-ին՝ «Թանգարանների գիշեր» համաեվրոպական միջոցառման շրջանակում, Հայաստանի պատմության թանգարանում համերգային ծրագրով հանդես եկավ «Կայթ» նվագախումբը: Երեկոյի ընթացքում հնչեցին պատմական Հայաստանի տարբեր գավառներից պահպանված երգեր՝ նոր մշակումներով, այդ թվում՝ «Գորանի», «Հավկունք վըր ծովունը», «Թագպարը» և այլն: Խմբի կատարումներում համադրված են ժողովրդական և ժամանակակից հնչողությունները՝ նոր երանգներ բացահայտելով ազգային երաժշտության մեջ:

Մայիսի 16-ին կայացավ «Ժողովրդական արվեստի հանգույց» հիմնադրամի` «Տորքի որդեգրում» ծրագրի ամենամյա ամփոփիչ ցուցահանդեսը, որտեղ համաձուլվել էին նրանց արդեն վաղեմի և նոր որդեգրված համայնքներում  ստեղծված ձեռագործ աշխատանքներ:
Ցուցադրությունը ներկայացնում էր  «Տորքի որդեգրում» ծրագրի համայնքների` անցած տարում կատարած աշխատանքները:
Մինչ միջոցառման ավարտը ժյուրիի անդամները՝ ռեժիսոր Ռուբեն Բաբայանը,  կինոռեժիսոր Գարեգին Զաքոյանը, ասեղնագործության վարպետ Արմինե Խաչատրյանը և գործվածքի վերականգնման  մասնագետ Նարինե Մարտիրոսյանը, պարգևատրեցին չորս անվանակարգերում հաղթող ճանաչված համայնքներին: Վերջին՝ հինգերորդ անվանակարգի հաղթողին այս անգամ ընտրեցին մասնակից համայնքները:
Այս տարի հաղթող ճանաչված հինգ համայնքներն են.
«Լավագույն դիզայն»- Բյուրեղավանի մարզամշակութային կենտրոն,
«Յուրահատուկ Ստեղծագործություն»- Նոյեմբերյանի մշակույթի կենտրոնը,
«Լավագույն աշխատանք»- Արագածի գուսան Աշխույժի անվան արվեստի դպրոց,
«Լավագույն համայնք»- Ծաղկունք համայնք,
«Հատուկ մրցանակ»-Մարտունու արվեստի մանկական դպրոց:
Ամեն տարի «Տորքի որդեգրման» ամփոփիչ ցուցահանդեսով է տրվում մեկնարկը նոր համայնքներում ծրագիրն իրականացնելու:
Ծրագիրը շարունակվում է ընդլայնվել՝ ներառելով նոր մարզեր ու համայնքներ:

Այս տարի «Թանգարանների գիշեր» համաեվրոպական միջոցառումն անցկացվեց մայիսի 17-ին, իսկ մայիսի 18-ին ավանդաբար նշվեց Թանգարանների միջազգային օրը՝ «Թանգարանների ապագան արագ փոփոխվող համայնքներում» խորագրի ներքո։
Հովհաննես Շարամբեյանի անվան ժողովրդական արվեստների թանգարանը, որ զբաղվում է ոչ նյութական մշակութային ժառանգության պահպանությամբ և հանրահռչակմամբ, մշակութային երկօրյա տոնին բացեց իր դռները բազմաթիվ այցելուների առջև՝ վերանորոգման աշխատանքներից հետո։ Թանգարանում նաև անցկացվեցին հայկական ավանդական խաղեր՝ «Վարը վարենկ» նախաձեռնության հետ համատեղ։

Այս տարի նշվում է Հայրիկ Մուրադյանի 120-ամյակը։ Եվ «Բարձունք»-ի «Ձայնիկ ունիմ» շարքի առաջին հանդիպումը նվիրված էր հենց իրեն՝ Հայոց երգի հայրիկին։ Օրվա հյուրն էր բանահավաք, էթնոերաժշտագետ, պրոֆեսոր Ալինա Փահլևանյանը։
Հայրիկ Մուրադյանի երգացանկը (ավելի քան 150 գեղջկական և քաղաքային երգեր) նոտագրվել և «Հայրենի երգեր» կոչվող ժողովածուի տեսքով լույս է տեսել հենց շնորհիվ Ալինա Փահլևանյանի։