2026 թ. հոկտեմբերի 16-18-ը Երևանի Հովհաննես Շարամբեյանի անվան Ժողովրդական արվեստների թանգարանը ժողովրդական արվեստի ջատագով Հովհաննես Շարամբեյանի 100-ամյակի միջոցառումների շրջանակում կկազմակերպի «Հայկական ժողովրդական և դեկորատիվ-կիրառական արվեստ» խորագրով գիտաժողով, որը կնվիրվի ՅՈՒՆԵՍԿՕ-ի Ոչ նյութական մշակութային ժառանգության միջազգային օրվան։ Գիտաժողովի նպատակն է նորովի ներկայացնել Հայաստանի թանգարաններում պահպանվող ժողովրդական և դեկորատիվ-կիրառական արվեստի ժառանգությունը, թանգարանային հավաքածուների հիմքով քննարկել հայկական ժողովրդական արվեստի պատմությանն ու տեսությանը վերաբերող տարբեր հիմնախնդիրները և առաջադրել դրանց լուծման ուղիները:
Գիտաժողովի ընթացքում տեղի կունենան քննարկումներ ոչ նյութական մշակութային ժառանգության պահպանությանն ուղղված տարբեր թեմաներով, մասնավորապես հայկական ժողովրդական և դեկորատիվ-կիրառական արվեստի պատմությունը, ՀՀ թանգարանների և մասնավոր հավաքածուների, ինչպես նաև Ժողովրդական վարպետների ստեղծագործությունների ուսումնասիրություններ, դեկորատիվ արվեստի տարբեր ժանրերին ու ստեղծագործողներին նվիրված հետազոտություններ և հիմնախնդիրներ: Նախատեսվում է քննարկել նաև ժողովրդական արվեստը դիզայնում, թվայնացում և թվային ժառանգություն, կրթություն, նոր մեթոդներ, ստեղծարար ուսուցում և ստեղծարար արդյունաբերություն թեմաները: