Հայաստանի Հանրապետության Ոչ Նյութական Մշակութային Ժառանգություն
«Պարատոն»
Դեկտեմբերի 23-ին տեղի կունենա հերթական ՊԱՐԱՏՈՆ միջոցառումը։
ՊԱՐԱՏՈՆԸ միաժամանակ կանցկացվի հետևյալ համայնքներում.
• Գեղարքունիքի մարզ, Ծաղկունք գյուղի բաց դպրոց,
• Վայոց ձորի մարզ, Արենի համայնք, Խաչիկ գյուղի մշակույթի տուն,
• Շիրակի մարզ, Գյումրի (Աբովյան 135),
• Սյունիքի մարզ, Գորիս (Վերիշենի միջնակարգ դպրոց),
• Լոռու մարզ, Վանաձոր (Տիգրան Մեծ, շ․ 2),
• Արցախ, Ստեփանակերտ (Վաղարշ Վաղարշյան 7)։
Այս անգամ միջոցառմանը միացել են՝
• «Կայթ» մշակութային հանգույցը,
• «Գագարին» նախագիծը («Դար» հիմնադրամ),
• Արենիի համայնքապետարանը,
• «Մենք» ազգագրական պարի խումբը,
• «Արև է ելել» նախագիծը,
• «Թագպար» նվագախումբը,
• «Վարը վարենկ» կրթամշակութային ՀԿ-ն,
• «Իրական դպրոց» կրթամշակութային հիմնադրամը։
Պարերի ամսական միջոցառումների ավանդույթը սկիզբ է դրվել շուրջ 20 տարի առաջ՝ «Մեր քաղաքը մեր տունն է» հիմնադրամի, «Կարին» ավանդական երգ ու պարի խմբի և «Նարեկացի» արվեստի միության կողմից։ Նախաձեռնությունը տարիներ շարունակ և առ այսօր, ամեն ամսվա վերջին ուրբաթ օրը մեզ բոլորիս ուս ուսի է շարում Երևանի տարբեր հրապարակներում և սրահներում։
ՊԱՐԱՏՈՆԸ տարիներ շարունակ իրականացվող միջոցառմանը միանալու յուրատեսակ կոչ է Հայաստանի և Սփյուռքի տարբեր համայնքներին, որի նպատակն է միանալ ազգային պարերի մշակույթի տարածման արդեն իսկ ձևավորված ավանդույթին՝ դարձնելով այն համահայկական պարատոն։
Եռախոսություն նախագիծ Խաչիկ գյուղում
Երկրորդ ամիսն է «Արև է ելել» ծրագիրն իր բովանդակությամբ ակտիվացրել է Արենի համայնքի Խաչիկ գյուղի մշակութային կյանքը։
Շարունակելով բռնած ճանապարհը՝ դեկտեմբերի 21-ին Խաչիկի Մշակույթի տանը ծրագիրը ներկայացավ ամանորյա համերգով։ Այս անգամ բեմից հնչեց դափի, թառի և երգի «Եռախոսություն»-ը։ Հայկական ժողովրդական՝ աշուղական, գեղջկական, ազգագրական, հոգևոր և այլ ժանրի երգերն ու երաժշտությունները ներկայացվեցին «Եռախոսություն» նախագծի հիմնադիրներ Արամ Մովսիսյանի և Ալեքսանդր Սահակյանի կողմից։
Միջոցառումն ամփոփվեց «Արև է ելել» ծրագրի շրջանակներում Խաչիկ համայնքում ստեղծված արվեստի կենտրոնի սաների կավի և ասեղնագործության արվեստարանների աշխատանքների ցուցադրությամբ և «Թագպար» նվագախմբի նվագակցությամբ՝ ազգային երգ ու պարի տրամադրությամբ, հայկական կենաց ծառի շուրջ տոնախմբությամբ։
Թաղիքե հրեշտակների պատրաստում Ժողովրդական արվեստների թանգարանում
Դեկտեմբերի 20-ին Ժողովրդական արվեստների թանգարանում տեղի ունեցավ թաղիքե հրեշտակների պատրաստման վարպետաց դաս, որն անցկացրեց Բուրաստան Նիկողոսյանը (ԿԵՆԱՑ ՏՈՒՆ մշակութային ՀԿ)։
«Ակունք» պետական ազգագրական համույթը Կապանում
Դեկտեմբերի 18-ին Կապանի Ալ․ Շիրվանզադեի անվ․ պետական դրամատիկական թատրոնում ելույթ ունեցավ Մարո Մուրադյանի անվան «Ակունք» պետական ազգագրական համույթը․ գեղարվեստական ղեկավար՝ Արթուր Շահնազարյան։
Նախագիծն իրականացվել է ՀՀ կրթության, գիտության, մշակույթի և սպորտի նախարարության աջակցությամբ։
«Ակունք» ազգագրական համույթը Գորիսում
Դեկտեմբերի 17-ին Գորիսի Վ․ Վաղարշյանի անվ․ պետական դրամատիկական թատրոնում ելույթ ունեցավ Մարո Մուրադյանի անվան «Ակունք» պետական ազգագրական համույթը․ գեղարվեստական ղեկավար՝ Արթուր Շահնազարյան։
Նախագիծն իրականացվել է ՀՀ կրթության, գիտության, մշակույթի և սպորտի նախարարության աջակցությամբ։
«Տոնածառ և Ավետիսների ուսուցում»
«Հեքիաթի տանը» պատրաստվում են Նոր Տարվա և Սուրբ Ծննդյան տոներին.
դեկտեմբերի 17-ի միջոցառման մասնակիցները միասին զարդարեցին ավանդական տոնածառը և երգեցին Ավետիսներ, պատրաստեցին ծիսական տիկնիկներ Ակլա Մարեն, Ասիլ Բասիլը, վայելեցին անուշաբույր կաթնահունց, ունկնդրեցին Ստվերների թատրոնի ներկայացում և իհարկե Կաղանդ պապի և Սուրբ Ծննդյան պատումները։
Պարենք, երգենք միասին
Դեկտեմբերի 16-ին Կոմիտասի թանգարան-ինստիտուտում տեղի ունեցավ «Պարենք, երգենք միասին» միջոցառումը։
Ծրագրում՝ հայ ավանդական պարերի ուսուցում «Արեգ» ազգային
պարի խմբի մասնակցությամբ (գեղ. ղեկավար, պարուսույց՝ Արտավազդ Այվազյան) և հայ ժողովրդական երգերի ուսուցում
(երգուսույց` Հասմիկ Բաղդասարյան Դոլուխանյան)։
Երգում ենք ավետիսներ Հասմիկ Բաղրամյանի հետ
«Մեր երգերը և մենք» նախաձեռնության հերթական՝ դեկտեմբերի 16-ի հանդիպումը հեքիաթով ու հրաշքով լի էր։
Միջոցառումը տեղի ունեցավ Ժողովրդական արվեստների թանգարանում։ Մասնակիցները երգեցին ավետիսներ, զրուցեցին ավանդական Ամանորի և Սուրբ ծննդյան խորհրդի, ծեսերի մասին։
Միջոցառման հյուրն էր «Տոնացույց» ավանդական տոների և կենցաղային ծեսերի թանգարանի նախագահ, ազգագրագետ Հասմիկ Բաղրամյանը։
«Տատիկիս գործած գորգը»․ կրթական ծրագիր ՀՊԹ-ում
Հայաստանի պատմության թանգարանը «Դրվագներ ինքնության․ գորգ» խորագրով ցուցադրության շրջանակում մեկնարկում է նոր կրթական ծրագիր։ Այն նախատեսված է միջին և ավագ դպրոցական տարիքի երեխաների համար։
Ծրագրի առաջին հատվածում երեխաները կունենան շրջայց համապատասխան ցուցասրահներում, որի ընթացքում մասնագետը կպատմի գորգագործության զարգացման ընթացքը, տեսակները, սիմվոլները: Այնուհետև մասնակիցները կբաժանվեն 2 խմբի: Նրանց կտրվի հայկական գորգի սիմվոլներով ծածկագիր, որի միջոցով մասնակիցները կբացահայտեն հաղորդագրությունը: