Քննարկվել են ՀՀ ոչ նյութական մշակութային ժառանգության արժեքների ցանկում գրանցման ներկայացված առաջարկները

Քննարկվել են ՀՀ ոչ նյութական մշակութային ժառանգության արժեքների ցանկում գրանցման ներկայացված առաջարկները

Հայտարարություններ

ՀՀ ԿԳՄՍ նախարարությունում տեղի է ունեցել ԿԳՄՍ նախարարին կից ոչ նյութական մշակութային ժառանգության հարցերի մասնագիտական խորհրդի հերթական նիստը:
Նիստը վարել է խորհրդի նախագահ, երաժշտագետ Հռիփսիմե Պիկիչյանը: Հանդիպմանը քննարկվել են ՀՀ ոչ նյութական մշակութային ժառանգության արժեքների ցանկում գրանցման ներկայացված առաջարկները:
Առանձին-առանձին անդրադառնալով ներկայացված առաջարկներին՝ խորհրդի անդամները հանդես են եկել դիտողություններով, մասնագիտական առաջարկություններով: Հիմնական դիտողությունները վերաբերել են համայնքների, պետական և հասարակական կազմակերպությունների կողմից ներկայացված առաջարկների առանձնահատկություններին և կենսունակությանը: Ընդգծվել է արժեքի տարածման և կիրառման աշխարհագրությունը և բնութագիրը հստակեցնելու պահանջը:
Խորհուրդը քննարկել է նաև առաջարկների կազմման, լրացման կարգի մասին հասարակության իրազեկման անհրաժեշտությանն ու աջակցությանը վերաբերող հարցեր: Այդ նպատակով առաջարկվել է կազմակերպել մասնագիտական վերապատրաստումներ՝ ներգրավելով նաև մարզերի մշակութային ոլորտի համակարգողներին:
Ոչ նյութական մշակութային ժառանգության արժեքների ցանկում գրանցման ներկայացված առաջարկները քննարկելիս մասնագիտական խորհուրդն ընդգծել է դրանց պահպանությանն ուղղված քաղաքականության մշակման կարևորությունը:
Ամփոփելով նիստը՝ խորհուրդը որոշել է ներկայացված առաջարկների մի մասը մասնագիտական դիտարկումների համաձայն ուղարկել լրամշակման և դիտարկել համայնքներից, խմբերից, անհատներից, ինչպես նաև մշակութային, կրթական և հասարակական կազմակերպություններից նոր առաջարկների ստացման հնարավորությունը:

Ֆրանկոֆոնիայի միջազգային կազմակերպության նախագահությունը Հայաստանից կփոխանցվի Թունիսին

Ֆրանկոֆոնիայի միջազգային կազմակերպության նախագահությունը Հայաստանից կփոխանցվի Թունիսին

Հայտարարություններ

Նոյեմբերի 19-20-ը Թունիսի Ջերբա քաղաքում տեղի է ունենալու Ֆրանկոֆոնիայի միջազգային կազմակերպության (ՖՄԿ) 18-րդ գագաթնաժողովը, որի ընթացքում Հայաստանը ՖՄԿ գագաթնաժողովի նախագահությունը փոխանցելու է Թունիսին:
Գագաթնաժողովի շրջանակում նոյեմբերի 13-20-ը Ջերբա քաղաքում գործելու է Ֆրանկոֆոնիայի ավան։ Մասնակից երկրները, ՖՄԿ գործընկերներն ու գործակալությունները հնարավորություն կունենան ցուցադրել իրենց երկրների մշակութային բազմազանությունը. ձեռագործ աշխատանքների ցուցահանդես-վաճառք, մասնակից պետությունների զբոսաշրջային հնարավորությունների, արվեստի ու մշակույթի գործերի, ինչպես նաև ազգային խոհանոցի ներկայացում:
Այս հարթակում Հայաստանի Հանրապետությունը ներկայանալու է «Մշակույթ և տեխնոլոգիա» խորագիրը կրող տաղավարով, որի ձևավորման առանցքում հայկական հարուստ գորգագործական մշակույթն է:
Ցուցադրվելու են գորգեր (բուրդ, մետաքս) և ասեղնագործ նմուշներ, անցկացվելու են գորգագործության վարպետության դասեր, լինելու են շրջայցեր VR ակնոցի միջոցով, ինչպես նաև ներկայացվելու է «Արմաթ» ճարտարագիտական աշխատանոցի կրթական նախագիծը՝ 3D տպիչների միջոցով:
Գագաթնաժողովի շրջանակում Հայաստանից հանդես կգան «Մեկնարկ» տաղանդի զարգացման նպատակային ծրագրի երաժշտական խումբն ու պատանի քանոնահարները: Պատանի երաժիշտները նախատեսվող համերգին կներկայացնեն դասական և ազգային ստեղծագործությունների կատարումներ:

Հայտարարություն՝ ՀՀԿԳՄՍՆԴՄՄԺ-021 ծածկագրով դրամաշնորհային մրցույթի մասին

Հայտարարություն՝ ՀՀԿԳՄՍՆԴՄՄԺ-021 ծածկագրով դրամաշնորհային մրցույթի մասին

Հայտարարություններ
Հայտարարություն՝ ՀՀԿԳՄՍՆԴՄՄԺ-021 ծածկագրով դրամաշնորհային մրցույթի մասին

Հայտարարության սույն տեքստը հաստատված է մասնագիտական խմբի 2022 թ. հոկտեմբերի 20-ի N 1 որոշմամբ։
Մրցույթի ծածկագիրը` «ՀՀԿԳՄՍՆԴՄՄԺ-021»։

Հայաստանի Հանրապետության կրթության, գիտության, մշակույթի և սպորտի նախարարությունը (այսուհետ՝ նաև պատվիրատու), որը գտնվում է Վազգեն Սարգսյան 3, Կառավարական տուն 2 հասցեում, հայտարարում է դրամաշնորհի հատկացման մրցույթ, որը կազմակերպվում է armeps (www.armeps.am) էլեկտրոնային համակարգի միջոցով։ Մրցույթի արդյունքում հաղթող ճանաչված կազմակերպությանը սահմանված կարգով կառաջարկվի կնքել դրամաշնորհի տրամադրման՝ նվիրաբերության պայմանագիր (այսուհետ` պայմանագիր)։
Սույն մրցույթի անցկացման կարգը, հայտ կազմելու, ներկայացնելու պայմանները, ինչպես նաև մրցույթին մասնակցելու իրավունք չունեցող կազմակերպություններին ներկայացվող պայմանները սահմանված են հրավերով:
Մրցույթին մասնակցության հայտերն անհրաժեշտ է ներկայացնել էլեկտրոնային ձևով` էլեկտրոնային armeps (www.armeps.am) համակարգի միջոցով մինչև 2022 թ. նոյեմբերի 18-ը, ժամը 12:00-ն: Սույն հայտարարությունը էլեկտրոնային armeps (www.armeps.am) համակարգում հրապարակվելու օրը հրապարակվում է նաև պատվիրատուի՝ www.ecsc.am հասցեով գործող պաշտոնական ինտերնետային կայքում՝ նշելով հրապարակման ամսաթիվը:
Հայտերի բացումը տեղի կունենա էլեկտրոնային ձևով` armeps համակարգի միջոցով՝ 2022 թ. նոյեմբերի 18-ին, ժամը 12:00-ին։
Սույն հայտարարության հետ կապված լրացուցիչ տեղեկություններ ստանալու համար կարող եք դիմել մասնագիտական խմբի քարտուղար` Նաիրա Կիլիչյանին:
Հեռախոս՝ 010 599 629
Էլ. փոստ՝ [email protected]

Արաբական Միացյալ Էմիրությունների պատվիրակության պաշտոնական այցը՝ Հայաստան

Արաբական Միացյալ Էմիրությունների պատվիրակության պաշտոնական այցը՝ Հայաստան

Հայտարարություններ
Արաբական Միացյալ Էմիրությունների պատվիրակության պաշտոնական այցը՝ Հայաստան

ՀՀ ԿԳՄՍ նախարարի հրավերով հոկտեմբերի 17-21-ը պաշտոնական այցով Հայաստանի Հանրապետությունում կգտնվի Արաբական Միացյալ Էմիրությունների պատվիրակությունը, որի կազմում են Շարժայի ժառանգության ինստիտուտի նախագահ Նորին Գերազանցություն դոկտոր Աբդուլ Ազիզ Ալ-Մուսալլամը, նույն ինստիտուտի միջազգային կապերի տնօրեն Ահմեդ Ալ-Դահը և միջազգային կապերի տնօրենի տեղակալ Սաիֆ Ալ-Հաջրին:
Համագործակցության զարգացման նպատակով տեղի են ունենալու պաշտոնական հանդիպումներ, որոնց շրջանակում նախատեսվում է քննարկել փորձի փոխանական և համատեղ նախագծերի իրականացման, ինստիտուցիոնալ համագործակցության ընդլայնման, երկու երկրներում իրականացվող ծրագրերին համատեղ մասնակցության ապահովման հնարավորությունները:
Այցի շրջանակում նախատեսվում են պաշտոնական հանդիպումներ, այցելություններ մշակութային հաստատություններ, Դաշտադեմի ամրոց և Զվարթնոց տաճար:
Հիշեցնենք՝ ս. թ. մարտի 10-28-ը Արաբական Միացյալ Էմիրություններում կայացել է «Շարժայի ժառանգության օրեր» ամենամյա փառատոնը, որին Հայաստանը՝ որպես պատվավոր հյուր, մասնակցել է առանձին տաղավարով։ Հայաստանի ցուցադրության ընթացքում տեղի է ունեցել Շարժայի պաշտոնատար անձանց պատվիրակության այցը տաղավար՝ Նորին Գերազանցություն շեյխ Աբդուլլահ բին Սալեմ բին Սուլթան Ալ Քասիմիի գլխավորությամբ, ինչպես նաև Հայաստանի պաշտոնական պատվիրակության այցը` Շարժայի ժառանգության ինստիտուտ:

unesco

Միջազգային աջակցություն՝ ՀՀ Սյունիքի մարզի բանահյուսական ժառանգության պահպանմանը

Հայտարարություններ
unesco

2022 թ. ՅՈՒՆԵՍԿՕ-ի «Ոչ նյութական մշակութային ժառանգության պաշտպանության մասին» կոնվենցիայի հիմնադրամից «Միջազգային աջակցություն» անվանակարգով Հայաստանի Հանրապետությանը տրամադրվել է դրամաշնորհ (74,855.00 USD) «ՀՀ Սյունիքի մարզի բանահյուսական ժառանգության համայնքահեն գույքագրումը, փաստաթղթավորումը և պահպանումը» վերնագրով հայտի շրջանակում 2 տարի ժամկետով ծրագիր իրականացնելու համար:
Հայտը պատրաստվել է ՀՀ ԳԱԱ հնագիտության և ազգագրության ինստիտուտի նախաձեռնությամբ և ՀՀ կրթության, գիտության, մշակույթի և սպորտի նախարարության խորհրդատվական աջակցությամբ:
Ծրագրի նպատակն է գույքագրել, պահպանել և խթանել ՀՀ Սյունիքի մարզի ոչ նյութական մշակութային ժառանգությունը՝ որպես տարածաշրջանի տեղական առանձնահատկությունների ու ինքնության դրսևորում, քանի դեռ այն կենսունակ է և շրջանառվում է ժողովրդական հեքիաթների, առասպելների, լեգենդների, ավանդույթների, ասացվածքների, ծիսական երգերի և այլ ձևերով: Ներկայում անհրաժեշտություն է այս ամենի գրանցումը՝ կապված սերնդափոխության և ժառանգության փոխանցման ապահովման հետ:

Ծրագրի ընթացքում ՀՀ Սյունիքի մարզում իրականացվելու են տեղական բանահյուսության գույքագրման, դաշտային հետազոտական աշխատանքներ, ուսուցողական հանդիպումներ ժառանգության կրողների հետ՝ Արծվանիկ, Դավիթ Բեկ, Կապան, Շաղաթ, Թասիկ, Տեղ, Շինուհայր, Կարճևան, Լեհվազ համայնքներում, համագործակցություն Սյունիքի հայագիտական կենտրոնի, Գորիսի պետական համալսարանի հետ:
Ծրագրի շրջանակում սեպտեմբերի 25-ին Հայաստան կժամանի ՅՈՒՆԵՍԿՕ-ի միջազգային փորձագետ, Թեհրանի Շահիդ Բեհեշտի համալսարանի դասախոս Ժանետ Բլեյքը, որը վերապատրաստման դասընթաց կանցկացնի ծրագիրն իրականացնող խմբի համար՝ մասնագիտական խորհրդատվությամբ նպաստելով ծրագրի արդյունավետ կազմակերպմանը: Սյունիքում հավաքագրված և փաստաթղթավորված նյութերը կթվայնացվեն՝ ստեղծելով Սյունիքի բանահյուսական ժառանգության տվյալների շտեմարան և կայք:
Այս աշխատանքները համահունչ են ՅՈՒՆԵՍԿՕ-ի 2003 թվականի «Ոչ նյութական մշակութային ժառանգության պաշտպանության մասին» կոնվենցիային, «Հայաստանի Հանրապետության ոչ նյութական մշակութային ժառանգության մասին» օրենքի և այլ իրավական ակտերի դրույթներին:

8 (2)

«Արհեստագործների հզորացման կենտրոն» ծրագիր

Հայտարարություններ
8 (2)

ԱՄՆ ՄԶԳ-ն կաջակցի հայ արհեստագործներին վաճառելու իրենց արտադրանքը արտասահմանում՝ Արհեստագործների հզորացման կենտրոն ծրագրի միջոցով։ ԱՄՆ Միջազգային զարգացման գործակալությունն այս նոր ծրագիրը մեկնարկել է մասնավոր հատվածի հետ գործակցությամբ՝ NOVICA կազմակերպության հետ:
Արհեստագործների հզորացման կենտրոնի նպատակն է՝ կազմակերպել հայ վարպետների ստեղծագործությունների վաճառքը արտասահմանում, խթանել տեղական համայնքների տնտեսական զարգացումը, աջակցել հայ ավանդական մշակույթի և արվեստի ճանաչմանն աշխարհում։ Չորս տարի տևողությամբ ծրագրի բյուջեն կազմում է 2,866,578 ԱՄՆ դոլար։
Բազմաթիվ հայ տաղանդավոր արհեստագործներ դժվարանում են վաճառել իրենց արտադրանքը։ Հիմնական խնդիրները հետևյալն են՝ շուկայի սահմանափակ հասանելիություն, միջազգային շուկայի տենդենցներին համապատասխան արտադրանք մշակելու ուղղորդման կարիք, նյութատեխնիկական խոշոր ծախսեր և արտահանման ենթակառուցվածքների բացակայություն:
Այս ծրագիրը միտված է լուծելու վերոնշյալ խնդիրները՝ առաջիկա չորս տարում։
Ծրագիրը կներգրավի մոտ 1,000 արհեստագործի՝ ներառված ավելի քան 200 խմբերում։ Ընդհանուր առմամբ, ծրագիրը դրական ազդեցություն կունենա հազարավոր վարպետների գործունեության վրա։ Մինչ ծրագրի ավարտը սպասվում է ստեղծել ավելի քան 1,35 միլիոն ԱՄՆ դոլարի ընդհանուր եկամուտ, իսկ ծրագրի ավարտից հետո՝ տարեկան ավելի քան 500,000 ԱՄՆ դոլար։
Ծրագրի արդյունքում կմեծանա արհեստագործական արտադրանքի արտահանման շուկան։ Այն կստեղծի կայուն, կանխատեսելի շուկայական պահանջարկ, որը կախված չի լինի զբոսաշրջիկների հոսքից։ Արդյունքում կավելանան մշտական աշխատանքի հնարավորությունները, եկամուտները և կբարելավվի Հայաստանի գյուղական շրջաններում բնակվող արհեստագործների կենսամակարդակը։
Արհեստագործների թիվը մեծացնելու, նրանց կարողությունները զարգացնելու և արտադրանքի որակը բարելավելու համար՝ NOVICA-ն կկազմակերպի վարպետության դասընթացներ։
Ապրանքները կվաճառվեն NOVICA.com, UNICEF Market, the Smithsonian Folklife Festival Marketplace, the Kiva Store, և NOVICA-ի գործընկեր այլ առցանց հարթակներում։

Jogh varpet

ԺՈՂՈՎՐԴԱԿԱՆ ՎԱՐՊԵՏԻ ՎԿԱՅԱԿԱՆԻ ՇՆՈՐՀՈՒՄ

Հայտարարություններ
Jogh varpet

Եթե ստեղծագործում եք դեկորատիվ-կիրառական արվեստի ոլորտում՝ պահպանելով հայկական արհեստագործության ավանդույթները, ցանկանում եք Ձեր ներդրումն ունենալ ժողովրդական արվեստի պահպանման, շարունակական զարգացման և հաջորդ սերունդներին փոխանցելու գործում, օգտվել մի շարք արտոնություններից և դառնալ Ժողովրդական արվեստների թանգարանի բարեկամը, ապա շտապեք դիմել:

«Հովհաննես Շարամբեյանի անվան ժողովրդական արվեստների թանգարանը», շարունակելով իրականացնել ՀՀ ԿԳՄՍ նախարարության կողմից իրեն վստահված առաքելությունը, հայտարարում է 2022թ. ԺՈՂՈՎՐԴԱԿԱՆ ՎԱՐՊԵՏԻ վկայական շնորհելու համար անհրաժեշտ փաստաթղթերի ընդունելություն:

Կարող եք դիմել, եթե

  • Զբաղվում եք ձեռքի աշխատանքի վրա հիմնված ժողովրդական արվեստով (մետաղի, քարի, փայտի գեղարվեստական մշակում, խեցեգործություն, թաղիքագործություն, ասեղնագործություն, ժանեկագործություն, գորգագործություն, կարպետագործություն և այլն)՝ մեքենայական աշխատանքի թույլատրելի չափաբաժնով,
  • Տիրապետում եք տվյալ արվեստի համար պահանջվող վարպետության տեխնիկա-տեխնոլոգիական հմտություններին և Ձեր գործունեության մեջ պահպանում եք ժողովրդական արվեստի պատմականորեն ձևավորված ավանդույթները (գեղարվեստական ու ոճական առանձնահատկություններ, կիրառվող նյութեր ու դրանց մշակման տեխնիկական և գեղարվեստական եղանակներ),
  • Ձեր ներկայացրած ստեղծագործությունների առնվազն կեսը ստեղծված է հայկական արհեստագործության ավանդույթներին համապատասխան (տեխնիկա, առանձնահատկություն, ազգային դիմագիծ, ավանդույթների պահպանման գեղարվեստական մոտեցում և այլն), իսկ մյուս կեսը կարող է լինել նորամուտ արհեստների կատարման եղանակով՝ ներառելով հայկական որոշակի տարրեր,
  • Մասնակցել եք առնվազն 2 ցուցահանդեսի,
  • ՀՀ քաղաքացի եք կամ Հայկական սփյուռքի ներկայացուցիչ,
  • Լրացել է Ձեր 18 տարին:

Անհրաժեշտ փաստաթղթեր.

  • Դիմում,
  • Լրացված հարցաթերթիկ,
  • Անձը հաստատող փաստաթղթի պատճեն,
  • Երկու գունավոր լուսանկար՝ 3×4 չափի,
  • Ինքնակենսագրական (ցանկության դեպքում նաև տեսաուղերձի միջոցով. տեսաուղերձը պարտադիր է Սփյուռքում բնակվող վարպետների համար),
  • Առնվազն 20 ստեղծագործության գունավոր լուսանկար՝ կից նկարագրություններով (ներկայացվող լուսանկարները պետք է լինեն առնվազն 1680×1320 չափի և JPG ձևաչափով, տպագրական տարբերակով ներկայացնելու դեպքում՝ առնվազն 13×18 սմ):

Դիմումի ձևը և հարցաթերթիկը կարող եք ներբեռնել ստորև:

Դիմումի ձև
Հարցաթերթիկ

Փաստաթղթերն անհրաժեշտ է ուղարկել [email protected] էլ.փոստին: Ուղարկելու հնարավորություն չունենալու դեպքում կարող եք փաստաթղթերը տպագիր տարբերակով ներկայացնել Ժողովրդական արվեստների թանգարան (ք. Երևան, Աբովյան 64)՝ երեքշաբթիից շաբաթ օրերին, ժամը 11:00-ից 17:00-ն: Հարցերի դեպքում նշված ժամերին կարող եք զանգահարել՝ 094-53-10-73, 077-45-76-97:

✔ Դիմելու վերջնաժամկետ՝ ՀՈԿՏԵՄԲԵՐԻ 15:
✔ Առաջին փուլի ընտրության արդյունքները կամփոփվեն հոկտեմբերի 31-ին:

Ամառային_մշակութային_ճամբար_Ջավախքում (1)

Ամառային մշակութային ճամբար Ջավախքում

Հայտարարություններ
Ամառային_մշակութային_ճամբար_Ջավախքում (1)

ՀՀ կրթության, գիտության, մշակույթի և սպորտի նախարարության աջակցությամբ և «Ջավախք» հայրենակցական-բարեգործական հասարակական կազմակերպության նախաձեռնությամբ 2022 թ. հուլիսի 9-18-ը Նինոծմինդայի շրջանի Գանձա գյուղում իրականացվել է «Ամառային մշակութային ճամբար Ջավախքում» խորագրով ծրագիրը:
Ծրագրին մասնակցել են Ջավախքի 5 համայնքների (Գանձա, Սաղամո, Փարվանա, Մեծ Արագյալ, Դամալա) 9-15 տարեկան 40 երեխաներ:
10 օրերի ընթացքում գործնական գիտելիքների և հմտությունների փոխանցման միջոցով երեխաները հաղորդակցվել են հայկական մշակութային ժառանգությանը, մասնավորապես՝ խեցեգործության, ասեղնագործության, տիկնիկագործության, գեղանկարչության, դիզայնի ուղղություններին, հայկական ավանդական պարերին ու խաղերին, ինչպես նաև անցկացրել են մարմնամարզական վարժանքներ։ Հայկական մշակույթին և արվեստին հաղորդակցման ընթացքում անդրադարձեր են եղել նաև վրացական մշակույթին ու արվեստին:
Ճամբարն իրականացվում էր մեծանուն բանաստեղծ Վ. Տերյանի ծննդավայր Գանձայում, ավելին՝ Վ. Տերյանի տուն-թանգարանի բակում: Դասընթացների ընթացքում մասնակիցները ծանոթացել են նաև Վահան Տերյանի կյանքին ու պոեզիային։
Ծրագրի իրականացումը նպաստել է ոչ միայն ջավախքաբնակ երեխաների հոգևոր-ազգային և մշակութային զարգացմանը, այլև էկոլոգիական, բարոյական, ֆիզիկական դաստիարակությանն ու արժեհամակարգի ձևավորմանը:

Տարեցների_ձեռարվեստի_ցուցադրություն՝_մշակութային_ժառանգության_պահպանության (1)

Տարեցների ձեռարվեստի ցուցադրություն՝ մշակութային ժառանգության պահպանության համար

Հայտարարություններ
Տարեցների_ձեռարվեստի_ցուցադրություն՝_մշակութային_ժառանգության_պահպանության (1)

Օգոստոսի 12-ին՝ ժամը 13:00-ին, «Տարեցների առողջության և խնամքի ապահովման ասոցիացիա» հասարակական կազմակերպության «Երկարակեցության կենտրոնում» տեղի կունենա «Տարեցների փորձը և մշակութային կրթությունը ի նպաստ երկրի զարգացման» ծրագրի ամփոփիչ ցուցահանդեսը:
Ծրագիրն իրականացրել է «Տարեցների առողջության և խնամքի ապահովման ասոցիացիա» հասարակական կազմակերպությունը ՀՀ ԿԳՄՍ նախարարության «Ոչ նյութական մշակութային ժառանգության պահպանության ծրագրեր» անվանակարգի դրամաշնորհի շրջանակում:
Նշենք, որ տեղի են ունեցել ձեռարվեստի ավանդական տեսակների՝ կարպետագործության և ասեղնագործության դասընթացներ «Տարեցների առողջության և խնամքի ապահովման ասոցիացիայի» 25 շահառուների՝ 63 և ավել տարիքի մեծահասակների համար, որոնք ուղղված են եղել ոչ նյութական մշակութային ժառանգության պահպանման և տարածման միջոցով տարեցների մտավոր և հոգեբանական առողջության խթանմանը, բարեկեցությանը և հասարակական կյանքում նոր հնարավորությունների ընդլայնմանը։
Ծրագրում առանցքային դերակատարում ունի տարեցների փորձի իրացումը և նրանց շարունակական (ցկյանս) կրթության ապահովումը:
Ոչ նյութական մշակութային ժառանգության պահպանությանն ուղղված ներառական միջոցառումների իրականացումը կարևոր նախապայման է երկրի կայուն զարգացման, մեծահասակների ֆիզիկական և մտավոր առողջության, ինչպես նաև սերունդների փորձի փոխանակման ու փոխանցման ապահովման ուղղությամբ։

gyumri

ԳՅՈՒՄՐԻ. վարպետաց քաղաք

Հայտարարություններ
293238297_5630242320339838_1757295896770032231_n

ՀՀ կրթության, գիտության, մշակույթի և սպորտի նախարարության, Գյումրու համայնքապետարանի և Հովհաննես Շարամբեյանի անվան ժողովրդական արվեստների թանգարանի համագործակցությամբ ս. թ. հուլիսի 16-ին, Գյումրիում տեղի կունենա «Գյումրի. վարպետաց քաղաք» փառատոնը:
Փառատոնին կմասնակցեն ժողովրդական ստեղծագործության վարպետներ Հայաստանի մի շարք համայնքներից և ԱՊՀ երկրներից, որոնք կներկայացնեն իրենց գեղարվեստական աշխատանքները և կիրականացնեն վարպետաց դասեր:
Հուլիսի 16-ին Գյումրին կդառնա արհեստների, ազգային երգ ու պարի, ավանդական զրույցների, համեղ ուտեստների և անմոռանալի զգացողությունների կենտրոն: Գորգագործության, ասեղնագործության, տիկնիկագործության, փայտագործության, խեցեգործության հարուստ մշակույթը ներկայացնող տաղավարներում այցելուները կծանոթանան Հայաստանի և ԱՊՀ երկրների ժողովուրդների արհեստագործական յուրօրինակ ավանդույթներին, կմասնակցեն վարպետաց դասերին, արհեստների շուրջ քննարկումներին, հնարավորություն կունենան ձեռք բերել ինքնատիպ հուշանվերներ:
Կենտրոնական հրապարակում կազմակերպված միջոցառումներին զուգահեռ փառատոնին կմիանան Գյումրու տարբեր մշակութային և արհեստագործական կազմակերպություններ ու անհատներ՝ ամենուրեք տարածելով վարպետաց քաղաքի շունչը։
Փառատոնն անցկացվում է 2022 թ․ հայտարարված ԱՊՀ ժողովրդական ստեղծագործության և մշակութային ժառանգության տարվա միջոցառումների շրջանակում:
Նպատակն է՝ մշակութային մեկ հարթակում միավորել արդի շրջանի ժողովրդական արհեստները, բարձրացնել դրանց ճանաչելիությունը և նպաստել այդ ժառանգությունը կրող ու փոխանցող անհատների ստեղծագործական առաջխաղացմանը։