engibaryan

Մեկնարկում է Լեոնիդ Ենգիբարյանի անվան մնջախաղի միջազգային 5-րդ փառատոնը

Իրադարձություններ

ՀՀ վարչապետի բարձր հովանու ներքո, ՀՀ մշակույթի նախարարության աջակցությամբ, Երևանի մնջախաղի պետական թատրոնի և Ծաղկաձորի քաղաքապետարանի նախաձեռնությամբ՝ ս. թ. օգոստոսի 10-15-ը, Ծաղկաձորում, Դիլիջանում և Երևանում կանցկացվի Լեոնիդ Ենգիբարյանի անվան մնջախաղի միջազգային 5-րդ փառատոնը:

Փառատոնի մեկնարկը կտրվի օգոստոսի 10-ին, ժամը 20:30-ին, Ծաղկաձորի Ծաղկունյաց հրապարակի բացօթյա բեմում: Փառատոնին կմասնակցեն թատերախմբեր՝ Հայաստանից, Սերբիայից, Վրաստանից, Իրանի Իսլամական Հանրապետությունից, Ուկրաինայից, Ռուսաստանից, Հարավաֆրիկյան Հանրապետությունից: Փառատոնի ընթացքում ներկայացումների և մանրապատումների ցուցադրություններից բացի կանցկացվեն վարպետության դասեր, գիտաժողովներ, տեսացուցադրություններ և քննարկումներ: Այս տարվա փառատոնի ծրագրում ներառված են նաև Երևանի մնջախաղի պետական թատրոնին կից խուլերի «Մենք» մնջախաղի թատրոն-ստուդիայի և ԵԹԿՊԻ մնջախաղի կուրսի աշխատանքները:

Փառատոնին նվիրված մամուլի ասուլիսի ընթացքում ՀՀ մշակույթի նախարարի տեղակալ Ներսես Տեր-Վարդանյանը մեկնարկի կապակցությամբ ողջունել է փառատոնի կազմակերպիչներին և նշել, որ թատերասեր հանրության համար փառատոնը սպասված է, այն տարեցտարի զարգանում է, նոր աջակիցներ ձեռք բերում և ընդլայնում աշխարհագրությունը:

Ս. թ. օգոստոսի 9-ին, «Լոֆթ» կենտրոնում տեղի ունեցած մամուլի ասուլիսին մասնակցել են նաև Ծաղկաձորի քաղաքապետ Արթուր Հարությունյանը, Երևանի մնջախաղի պետական թատրոնի գեղարվեստական ղեկավար և փառատոնի նախագահ Ժիրայր Դադասյանը, դերասաններ Ջոն Ջեյքոբսը

/Հարավաֆրիկյան Հանրապետություն/ և Վահրամ Զարյանը /Ֆրանսիա/:

sasna-crer-eposi-or

«Էպոսյան օրեր» փառատոնի էպոսասացության մրցույթն անցկացվեց Գավառի երկրագիտական թանգարանում

Իրադարձություններ

«Սասունցի Դավիթ» էպոսին նվիրված «Էպոսյան օրեր» փառատոնի էպոսասացության մրցույթն անցկացվեց Գավառի երկրագիտական թանգարանում։

ՀՀ մշակույթի նախարարության աջակցությամբ, «Սասնա տուն» հասարակական կազմակերպությունը ս. թ. օգոստոսի 5-ին, Գավառի երկրագիտական թանգարանում անցկացրել է «Էպոսյան օրեր» ավանդական փառատոնի էպոասասացության մրցույթը, որին մասնակցել են դպրոցականներ Հայաստանի Հանրապետության Գեղարքունիքի, Արարատի, Արագածոտնի, Կոտայքի և Շիրակի մարզերից, ինչպես նաև Լեռնային Ղարաբաղի Հանրապետությունից:
 

2011 թվականից անցկացվող փառատոնն առաջին երկու տարիներին իրականացվել է ՀՀ Արագածոտնի մարզում, իսկ 2013 թվականից ձեռք է բերել հանրապետական ձևաչափ՝ ընդգրկելով ՀՀ բոլոր մարզերը: Այս տարի փառատոնի հանրապետական փուլն անցկացվել է Գեղարքունիքի մարզում՝ նախորդ տարիներին փառատոնին մարզի դպրոցականների ակտիվ մասնակցության շնորհիվ: Մրցույթին մասնակցել են 7-16 տարեկան 25 դպրոցականներ, որոնք տարբեր հատվածներ են ներկայացրել «Սասունցի Դավիթ» էպոսից: Փառատոնին կատարողական ինքնատիպությամբ հատկապես աչքի են ընկել Լեռնային Ղարաբաղի Հանրապետության հինգ դպրոցականները, որոնք փառատոնի առաջատար են ճանաչվել և հատուկ մրցանակ ստացել, իսկ անհատական արդյունքներով մրցանակային առաջին տեղը զբաղեցրել է Գեղարքունիքի մարզի Կարմիրգյուղի N 2 միջնակարգ դպրոցի աշակերտ Նարեկ Սիմոնյանը, 2-րդ տեղը` Արարատի մարզի Զանգակատուն համայնքի միջնակարգ դպրոցի աշակերտուհի Էմմա Բադալյանը: 3-րդ մրցանակային տեղը շնորհվել է Գեղարքունիքի մարզի Մարտունի քաղաքի N 1 հիմնական դպրոցի աշակերտ Սամվել Ավետիսյանին և Գեղարքունիքի մարզի Կարմիրգյուղի N 1 միջնակարգ դպրոցի աշակերտուհի Լուսինե Մարդոյանին:

Փառատոնի բոլոր մասնակիցներն արժանացել են պատվոգրերի և խրախուսական այլ պարգևների:

anipemza

«Երերույ­ք-­Անի­պեմզա» ծրագրի մեկնարկն ազդարարվեց

Իրադարձություններ

«Եվրոպա Նոստրա» կազմակերպության «7 առավել վտանգված» հուշարձանների ցանկում ընդգրկված «Երերույ­ք-­Անի­պեմզա» ծրագրի մեկնարկն ազդարարվեց։ Ս. թ. հուլիսի 19-23-ը Հայաստանում են գտնվում «Եվրոպա Նոստրա» կազմակերպության և Եվրոպական ներդրումների բանկ-ինստիտուտի մի խումբ փորձագետներ՝ պաշտոնապես ազդարարելու ՀՀ մշակույթի նախարարության աջակցությամբ իրականացվող՝ «Եվրոպա Նոստրա» կազմակերպության «7 առավել վտանգված» հուշարձանների ցանկում ընդգրկված«Երերույ­ք-­Անի­պեմզա»ծրագրի մեկնարկը: Այդ կապակցությամբ՝ ս. թ. հուլիսի 22-ին, Հա­յաստանի ազգային գրադարանում կայացավ մամուլի ասուլիս, որին մասնակցում էին ՀՀ մշակույթի նախարարի տեղակալ Արև Սամուելյանը, «Եվրոպա Նոստրայի» «7 առավել վտան­գ­ված» հուշարձաններ ծրագրի հիմնադիր, խորհրդի անդամ Գայ Կլաուսը, գի­տական խորհրդի անդամներ Պաոլո Վիտտին և Վիսնյա Կիսիչը, Եվրոպական ներ­դրման բանկի անդամ Մարիա Բերժան, «Մշակութային ժառանգու­թյան պահ­պանումը Հայաստանում» ծրագրի ղեկավար Գայանե Կազնատին:

 Ասուլիսին անմիջապես հաջորդեց «Երերույք և Անիպեմզա, անցյալի հիշողություններ, առօրյա կյանք և ապագայի երազանքներ» խորագրով լուսանկարչական ցուցահանդեսի բացումը: Ցուցահանդեսին ներկայացված էին «Երերույ­ք-­Անի­պեմզա» ծրագրի ընթացքում հայտարարված լուսանկարչական մրցույթի, ավելի քան 40 աշխատանք: Մրցույթը բաղկացած էր «Պատմական և շրջակա միջավայրի հուշարձանները», «Անիպեմզա բնակավայրն ու նրա մարդիկ» անվանակարգերից: Մրցույթի նպատակն էր ներկայացնել Երերույք հնագիտական վայրը և նրա շրջակայքում ապրող մարդկանց, վեր հանել ու արժևորել Շիրակի մարզի այս հատվածի առավել հետաքրքիր բնապատկերները: Ցուցահանդեսի շրջանակում հայտարարվեց մրցույթի հաղթողների անունները. «Հատուկ մրցանակ»` Արթին Մուրադյան, «Պատմական և շրջակա միջավայրի հուշարձանները» անվանակարգ՝ Արտուշ Ավդալյան, «Անիպեմզա բնակավայրն ու նրա մարդիկ» անվանակարգ՝ Լիլիթ Դավթյան: Հաղթողներն արժանացան դրամական պարգևների: Մրցույթին մասնակցած լավագույն լուսանկարները կտեղադրվեն «Երերույ­ք-Անիպեմզա» ծրագրի կայքէջում:
 

Լուսանկարչական ցուցահանդեսի բացումից անմիջապես հետո հրավիրվեց «Հայաստանի մշակու­թային ժառանգության պահպանմանն ուղղված նախագծերը, միջոց­ներն ու գաղափարները» խորագրով կլոր սեղանը: Քննարկմանը մասնակցում էին ոլորտի մասնագետներ, շահագրգիռ գերատեսչությունների և Հայաստանում հավատարմագրված միջազգային կազմակեր­պու­թյունների ներկայացուցիչներ: Փորձագիտական խումբը կներկայացնի «Երերույ­ք-­Անի­պեմզա» ծրագրի իրականացման վերաբերյալ իր տեսլականը:

 Հիշեցնենք, որ Երերույք հնագիտական հուշարձանը և Անիպեմզա գյուղը` ս. թ. մարտի 16-ին՝ Վենետիկում կայացած «Եվրոպա Նոստրա» մրցանակաբաշխության ժամանակ ներառվել են «7 առավել վտանգված» հուշարձանների ցանկում: Ծրագրի հայտը ներկայացրել է «Եվրոպա Նոստրայի» անդամ՝ Հայկական մշակույթի ուսումնասիրման և վավերագրման կենտրոնը:

 Նշենք նաև, որ «Եվրոպա Նոստրայի» «7 առավել վտանգ­ված» հուշարձանների ցանկը ձևավորվում է տարբեր ոլորտների միջազգային փորձագետների (պատմություն, հնագիտություն, ճարտարապետություն, պահպանություն, ծրագրերի վերլուծություն և ֆինանսներ) կատարած ուսումնասիրությունների եզրակացությունների հիման վրա: Առավել վտանգված հուշարձանների և տեսարժան վայրերի ցանկում ընդգրկված են նաև եվրոպական 7 երկրից՝ Փաթառեյ ծովային բերդը Տալլինում (Էստոնիա), Հասանքեյֆ հնագույն քաղաքը և շրջակայքը (Թուրքիա), Սբ Անտոնիոս Պադուացու տաճարը, Էքստրեմադուրան (Իսպանիա), Վենետիկյան ծովածոցը (Իտալիա), Կամպուս Հիոսը (Հունաստան), Հելսինկի-Մալմի օդանավակայանը (Ֆինլանդիա) և Քոլբերի բացվող կամուրջը Դիեպում (Ֆրանսիա):
sasna-crer

«Սասնա ծռեր» էպոսին նվիրված «Էպոսյան օրեր» փառատոնը զորամասում

Իրադարձություններ

ՀՀ մշակույթի նախարարության աջակցությամբ «Սասնա տուն» ՀԿ-ի կողմից իրականացվող «Սասնա ծռեր» էպոսին նվիրված «Էպոսյան օրեր» ամենամյա փառատոնի 2016 թ. իրականացվող ծրագրի շրջանակներում հուլիսի 20-ին մեծ միջոցառում անցկացվեց ՀՀ պաշտպանության նախարարության N զորամասում:

Միջոցառմանը ներկա էր տեղամասում գտնվող ողջ սպայական և զինվորական անձնակազմը: Բացման խոսքով հանդես եկավ գնդի հրամանատարի կազմակերպչական հարցերի գծով տեղակալ Ռ. Չիլինգարյանը, այնուհետև զինվորականներին ողջունեց «Սասնա տուն» ՀԿ-ի նախագահ, ծրագրի ղեկավար Ա. Ավագյանը՝ ներկայացնելով միջոցառման նպատակը և շնորակալություն հայտնելով ՀՀ պաշտպանության նախարարությանը և զորամասի հրամանատարությանը միջոցառման կազմակերպմանը աջակցելու համար:

«Հայոց բանակի զինվորը էպոսի զավակն է» զեկուցմամբ հանդես եկավ էպոսագետ, գրող և հրապարակախոս Անդրանիկ Ավետիսյանը, որին հաջորդեց «Սասուն» ազգագրական երգի-պարի համույթի ելույթը:

Համույթի պարին միացան նաև զինվորները և կրկին հայկական լեռնաշխարհում հնչեց մեր ավանդական ու հաղթական քոչարին:

Օրվա խորհրդին համահունչ, զորամասում թևածում էր «Սասնա ծռերի» հայրենասիրական ու ռազմական ոգին՝ մեծ ոգևորություն հաղորդելով զինվորականներին:

adsfd

‹‹Այս աշխարհի իմ անկյունը››

Իրադարձություններ

Արցախյան ազատամարտի մասնակից Վահրամ Միքայելյանի
‹‹Այս աշխարհի իմ անկյունը›› խորագրով անհատական ցուցահանդեսի վերաբերյալ

Հուլիսի 14-ին, ժամը 14:00-ին, Հովհաննես Շարամբեյանի անվան ժողովրդական ստեղծագործության կենտրոնում տեղի կունենա գեղանկարիչ, արցախյան ազատամարտի մասնակից Վահրամ Միքայելյանի՝ «Այս աշխարհի իմ անկյունը» խորագրով անհատական ցուցահանդեսի բացումը:

 Ցուցահանդեսը բաց կլինի մինչև հուլիսի 21-ը:
 

Վահրամ Միքայելյանը ծնվել է 1965 թ., Վայոց Ձորի մարզի Սերս գյուղում: Սովորել է տեղի միջնակարգ դպրոցում, Վայքի ուսումնարանում և Երևանի Փ. Թերլեմեզյանի անվան Գեղարվեստի ուսումնարանում:

 

1987 թ. Վայքի Մշակույթի տանը բացվել է նրա առաջին անհատական ցուցահադեսը: 1988 թ. միացել է պայքարի ելած հայորդիներին, մասնակցել նստացույցերին, այնուհետև օգնության հասել երկրաշարժից տուժածներին: 1989 թ. աշխատանքի է անցել Վայքի Մշակույթի տանը, հիմնել նկարչական խմբակ, ինչպես նաև նկարչություն է դասավանդել Վայքի թիվ 2 դպրոցում: 1991 թ. Նկարիչների միության նախագահ Արա Շիրազի կողմից արվեստանոց է նվեր ստացել՝ Վայք քաղաքում:

 1992 թ. Վահրամ Միքայելյանը, Վայքի կամավորական ջոկատի հետ մասնակցել է Լաչինի միջանցքի ինքնապաշտպանական մարտերին, ծանր վիրավորվել է և զրկվել աջ ձեռքից, բայց միևնույն է շարունակում է նկարել…
ashxarhy-mer-shurjy

Լուսանկարչական աշխատանքների ցուցահանդես ‹‹Աշխարհը մեր շուրջը››

Իրադարձություններ

Ս. թ. հուլիսի 8-ին, ժամը 14:00-ին, «Հովհաննես Շարամբեյանի անվան ժողովրդական ստեղծագործության կենտրոնը» Ռուսաստանի գրողների միության և Հայաստանի հետ բարեկամական կապերի մոսկովյան ընկերության հետ համատեղ, արվեստասեր հանրությանը կներկայացնի գրող, լուսանկարիչ Լևոն Օսեպյանի «Աշխարհը մեր շուրջը» խորագրով 8-րդ անհատական ցուցահանդեսը: Այն կգործի մինչև հուլիսի 9-ը:

 Լևոն Օսեպյանը ծնվել է 1952 թ. Երևանում: Տեխնիկական բարձրագույն կրթություն է ստացել Բաքվում: Ռուսաստանի գրողների միության վարչության անդամ է (2012 թ. կազմակերպչական գծով քարտուղար), գրողների և հրապարակախոսների միջազգային ասոցիացիայի անդամ, ինչպես նաև Պրոֆեսիոնալ նկարիչների ստեղծագործական միության անդամ:
 

Հեղինակ է «Այցելություն երկիր», «Պիեսներ», «Ճիչ», «Հեռախոսազանգ», «Իմ Գողգոթան» գրքերի: Նրա ստեղծագործությունները թարգմանվել են շատ լեզուներով:

 Լուսանկարչական աշխատանքների անհատական ցուցահանդեսներ է ունեցել Ռուսաստանում, Հայաստանում, Լեհաստանում, Չինաստանում, Իսրայելում և այլուր: Լևոն Օսեպյանի լուսանկարները գտնվում են մասնավոր հավաքածուներում (ԱՄՆ, Կանադա, Ֆրանսիա, Իտալիա, Իսպանիա, Իսրայել, Մեծ Բրիտանիա, Ավստրալիա, Իրան, Լեհաստան, Հոլանդիա, Գերմանիա, Ռուսաստան, Հայաստան):
gexankarchutyun

«Վրձնի հիշողության ձայնը Ակոռիից Աքորի» գեղանկարչական աշխատանքների ցուցահանդեսի վերաբերյալ

Իրադարձություններ

Ճարտարապետ Վարուժան Սիմոնյանի «Վրձնի հիշողության ձայնը Ակոռիից Աքորի» գեղանկարչական աշխատանքների ցուցահանդեսի վերաբերյալ

Ս. թ. մայիսի 26-ին, ժամը 15:00–ին, «Հովհաննես Շարամբեյանի անվան ժողովրդական ստեղծագործության կենտրոնը»՝ «Լոռվա ձոր» հայրենակցական միության հետ համատեղ հանրությանը կներկայացնի Վարուժան Սիմոնյանի «Վրձնի հիշողության ձայնը Ակոռիից Աքորի» խորագիրը կրող ցուցահանդեսը՝ նվիրված Հայաստանի Հանրապետության անկախության 25-ամյակին: Ցուցահանդեսը կգործի մինչև հունիսի 5-ը:

Վարուժան Սիմոնյանը ծնվել է 1956 թ. Թումանյանի շրջանի Ակոռի գյուղում: Ուսանել է Երևանի պոլիտեխնիկական ինստիտուտի ճարտարապետաշինարարա­կան ֆակուլտետում: 1986-1993 թթ. մասնագիտությամբ աշխատել է Ալավերդու պղնձաձուլական կոմբինատում: 1993թ. ընտրվել է Ալավերդու քաղաքային խորհրդի նախագահի տեղակալ և համատեղության կարգով՝ աշխատել որպես քաղաքի գլխավոր ճարտարապետ, ապա՝ քաղաքապետի տեղակալ: Վարել է նաև հասարակական գործունեություն՝ ղեկավարելով «Ալավերդու ընտանիքի օժանդակության կենտրոն» ՀԿ-ն: 2006 թ. առ այսօր աշխատում է Ալավերդու արհեստագործական պետական ուսումնարանում՝ որպես տնօրեն:

Գեղանկարչությամբ զբաղվել է դեռևս վաղ հասակից, սակայն վարպետություն է ձեռք բերել 2011 թ., երբ Ալավերդիում կազմակերպված «Լոռվա ներկապնակ» միջազգային հանդիպման շրջանակում ուսումնարանում կազմակերպվել են 8 երկրների նկարիչների վարպետության դասեր:

Նկարչի հիշողության արահետները պատկերում ոչ միայն են Ակոռի գյուղը, այլև հայրենի եզերքի այլ տարածքներ՝ Վայոց ձոր, Դիլիջան, Արագածոտն, ուր ստեղծվում են «Գյուղական դրվագ», «Դեպի Ակոռի», «Նորավանք, «Օհանավանք» կտավները: Ստեղծագործական այդ որոնումները չեն սահմանափակվում Հայաստան աշխարհով: Նա վրձնում է բնապատկերներ, նատյուրմորտներ, դիմանկարներ նաև Դոնբասից՝ «Գալյա տատի տունը», Էսենդուկիից՝ «Ամռան բույրը», Վանից՝ «Սուրբ Խաչը» և այլն:

Լոռվա աշխարհի զավակն իր ինքնաբուխ ստեղծագործություններով և Լոռվա հեքիաթային աշխարհի մաքուր ու ջերմ գույներով պատմում է հայրենի բնաշխարհի, շրջապատի մարդկանց մասին:

tiknik

«Հեղինակային տիկնիկ» խորագրով ցուցահանդես Երևանի պատմության թանգարանում

Իրադարձություններ

Ս. թ. մայիսի 20-ին Երևան քաղաքի պատմության թանգարանում բացվեց «Հեղինակային տիկնիկ» խորագրով ցուցահանդեսը՝ նվիրված երեխաների պաշտպանության միջազգային օրվան։

Այս ցուցահանդեսը առաջին փորձն է ներկայացնելու հեղինակային տիկնիկը, որպես հայկական դեկորատիվ-կիրառական արվեստի ինքնուրույն և կայացած ուղղություն, որն ընդգրկում է իր մեջ արվեստի տարբեր տեսակներ՝ քանդակ, գեղանկարչություն, դիզայն։ Տիկնիկ պատրաստելու հմտությունը և դրա հետ կապված հավատալիքները բնորոշ են հայկական ավանդական մշակույթին։ Հատկապես ծիսական տիկնիկների հետ կապված գիտելիքներն ու դրանց գործառույթները մեր ազգային ոչ նյութական մշակութային ժառանգության մի զգալի հատվածն են կազմում։

Ցուցահանդեսին մասնակցում են 30 հեղինակներ, որոնք ներկայացնում են տարբեր տեխնիկայի ու ժանրի 200-ից ավել տիկնիկներ: Ցուցահանդեսի ավարտին մասնակիցները նախաձեռնել են տիկնիկներ նվիրել Արցախի երեխաներին։


Ցուցահանդեսը կգործի մինչև հունիսի 20-ը։

tangaranneri-gisher

«Թանգարանների գիշեր» միջոցառումն այս տարի անցկացվում է «Թանգարանները և մշակութային լանդշաֆտները» խոր

Իրադարձություններ

2016 թվականին, «Թանգարանների գիշեր» միջոցառումը Հայաստանում անցկացվում է մայիսի 21-ին: Այն իրականացվում է Մշակութային ժառանգության պահպանության բնագավառում ամենահին միջազգային կազմակերպություններից մեկի` Թանգարանների  միջազգային  խորհրդի  /ԻԿՕՄ/ առաջարկով:

1977 թվականից ի վեր մայիսի 18-ը՝ «Թանգարանների միջազգային օրը» համախմբում է աշխարհի 5 մայրցամաքների, ավելի քան 30 հազար թանգարանների` կոչ անելով տարվա համար առաջարկված թեմայի շրջանակում հանդես գալ հատուկ միջոցառումներով ու նախաձեռնություններով: Յուրաքանչյուր տարի առաջադրվում է օրվա խորհրդին առնչվող որևէ յուրահատուկ թեմա, ինչը հնարավորություն է տալիս շեշտելու թանգարանների գործունեության բազմազանությունը: Այս տարվա կարգախոսն է` «Թանգարանները և մշակութային լանդշաֆտները»:

«Թանգարանների գիշեր» ծրագիրը մեկնարկել է 2005 թվականից՝ ԻԿՕՄ-ի, ՅՈՒՆԵՍԿՕ-ի և Եվրախորհրդի հովանավորությամբ: Օրվա նպատակն է բարձրացնել թանգարանների դերը հասարակության սոցիալ-մշակութային կյանքում, ստեղծել նպաստավոր միջավայր՝ թանգարանային առարկաների հանրահռչակման համար:

Գարնանային ակցիային, այս տարի մասնակցում է Հայաստանում գործող շուրջ 112 թանգարան:

Մայիսի 18-ին՝ «Թանգարանների միջազգային օրը», ժամը 10:00-18:00-ն մասնակից-թանգարաններն անվճար կգործեն բոլոր այցելուների համար, մայիսի 21-ին, ժամը 18:00-24:00-ն` կրկին անվճար:

Վերը նշված երկու օրերի ընթացքում, բազմաբովանդակ և յուրահատուկ միջոցառումներովթանգարաններն իրենց դռները կբացեն հասարակության առջև՝ հնարավորություն ստեղծելով ևս մեկ անգամ հետադարձ հայացք գցելու հայ ժողովրդի հազարամյակների պատմությանն ու մշակութային ժառանգությանը: Հատկանշական է, որ մասնակից թանգարանները հանդես են գալիս ինքնատիպ նախաձեռնություններով` փորձելով առավել հետաքրքիր ու անմոռանալի դարձնել այցելուների երեկոն: Այս միջոցառման նպատակն է վերարժևորել մշակութային ժառանգությունը, թանգարանային միջավայրում համադրել արվեստի ուղղություններն ու ապահովել մշակութային ջերմ մթնոլորտ:

litva

Լիտվայի Երաժշտության օրը գալիս է Երևան

Իրադարձություններ

2006 թվականին, երաժիշտ Անդրիուս Մամոնտովասի մտահղացմամբ՝ Լիտվայում անցկացվեց «Երաժշտության օրը», որը դարձավ ավանդական փառատոն: Փառատոնի ընթացքում, երաժշտության յուրաքանչյուր երկրպագու հրավիրվում և հնարավորություն է ստանում երգելու կամ նվագելու սիրելի քաղաքի փողոցներում:

«Եվրոպայի օրեր» միամսյակի շրջանակում, ՀՀ-ում Լիտվայի Հանրապետության Դեսպանությունը Երևանում առաջին անգամ կանցկացնի «Երաժշտության օր»: Փառատոնը կմեկնարկի ս. թ. մայիսի 21-ին, ժամը 16:00-ից, մայրաքաղաքի Հյուսիսային պողոտայում, Ազատության և Շառլ Ազնավուրի անվան հրապարակներում: Նույն օրը, երեկոյան ժամը 20:00-ին, Շառլ Ազնավուրի հրապարակում կկայանա նաև Գալա համերգ, որտեղ Ա. Սպենդիարյանի անվան երաժշտական դպրոցի ջազ-բենդը, Հայաստանի պետական երիտասարդական նվագախմբի լարային քառյակը, ինչպես նաև մի շարք հայտնի հայ երաժիշտ-կատարողներ, հանդես կգան իրենց լավագույն երաժշտական համարներով:

Ունկնդիրների և երաժշտության երկրպագուների համար վաղօրոք կտարածվեն թռուցիկներ՝ ելույթների վայրերի քարտեզավորմամբ և կատարողների ցանկով:

Փառատոնին մասնակցել ցանկացողները կարող են գրանցվել առցանց՝ «Երաժշտության օրվա» (SMD) պաշտոնական կայքում կամ էլեկտրոնային փոստով՝ նշելով կատարման համար նախընտրած վայրը, ժամանակը, ինչպես նաև հավելյալ տեղեկություն՝ խմբի, երաժշտական ոճի վերաբերյալ:

Փառատոնի մասին լրացուցիչ տեղեկությունները կարող եք տեսնել Լիտվայի Հանրապետության դեսպանության կայքում և ֆեյսբուքյան էջում:

Հեռախոս՝ +374 10 297 682/+374 10 297 683

Էլ. փոստ՝ [email protected]